مظفر گڑھ کے علاقے پیر جہانیاں میں گھر میں آگ لگنے سے ایک ہی خاندان کے 7 افراد جھلس کر جاں بحق ہوگئے۔
ریسکیو ذرائع کے مطابق گھر میں آگ لگنے کی وجہ تاحال معلوم نہیں ہو سکی لاشوں کو اسپتال منتقل کردیا گیا ہے۔ جاں بحق ہونے والوں میں ایک مرد، 2 خواتین اور 4 بچے شامل ہیں جن کی عمریں 2 سے 18 ماہ کے درمیان ہیں۔
علاقہ مکینوں کا کہنا ہے اہل خانہ گھر میں سوئے ہوئے تھے کہ گھر میں اچانگ آگ بھڑک اٹھی، جس کی وجہ تاحال معلوم نہیں ہو سکی، تاہم پولیس نے مقدمہ درج کرکے واقعےکی تحقیقات شروع کر دی ہیں۔
وزیر اعلیٰ پنجاب سردار عثمان بزدار نے آتشزدگی کے باعث قیمتی انسانی جانوں کے ضیاع پر افسوس کا اظہار کیا ہے اورکمشنر ڈیرہ غازی خان سے آتشزدگی کے واقعے کی رپورٹ طلب کر لی ہے، وزیراعلیٰ پنجاب نے واقعے کی ہر طرح سے مکمل تحقیقات کرنے کے احکامات بھی جاری کر دئیے ہیں۔