اقوام متحدہ کے جنرل سیکرٹری انتونیو گوتیرس نے امریکہ، مغربی ممالک اور دیگر عالمی اداروں سے اپیل کی ہے کہ وہ افغانستان کے منجمد اثاثے بحال کریں۔

عالمی خبر رساں ادارے کے مطابق نیویارک میں نیوز بریفنگ کے دوران اقوام متحدہ کے سیکرٹری جنرل نے کہا کہ طالبان کی سزا افغان عوام کہ نہیں دی جانی چاہیے، افغانستان کے منجمد اثاثے چاہے مشروط سہی لیکن بحال کئے جانے چاہئیں، انہوں نے کہا کہ افغانستان کا مستقبل ایک ڈراؤنا خواب نظر آرہا ہے، عالمی برادری کو افغان عوام کی مدد کرنی چاہیے۔

انتونیو گوتیریس کا مزید کہنا تھا کہ طالبان پر واضح کیا ہے کہ ان کی حکومت کو تسلیم کرنے کیلئے ضروری ہے کہ وہ انسانی حقوق کی فراہمی کو یقینی بنائیں، انہوں نے کہا کہ طالبان قیادت کو بتایا ہے کہ ایسا کرنا نہ صرف ان کی حکومت بلکہ افغان عوام کے بھی مفاد میں ہے۔

یاد رہے کہ گزشتہ برس اگست میں طالبان کے کابل پر کنٹرول کے بعد سے امریکہ نے افغانستان کے 7 ارب ڈالرز کے اثاثے منجمد کردیئے تھے، جب کہ عالمی تنظیموں کی جانب سے بھی ترقیاتی کام بھی روک دیئے گئے تھے، افغانستان میں طالبان حکومت کی جانب سے متعدد بار امریکہ اور عالمی اداروں سے منجمد اثاثے بحال کرنے کی اپیل کی جا چکی ہے۔