وزیراعلیٰ پنجاب سردار عثمان بزدار نے کہا ہے کہ  پاکستان کے 22کروڑ عوام کو وزیراعظم عمران خان کی شفاف قیادت پر پورا اعتماد ہے۔

عثمان بزدار نے اپنے جاری کردہ بیان میں کہا کہ اپوزیشن رہنماؤں نے ہمیشہ قومی اتحاد اور یکجہتی کو نقصان پہنچانے کی کوشش کی۔

انہوں نے کہا کہ موجودہ حالات کو پس پشت ڈال کر اپوزیشن نے منفی سیاست کی اور اپنی ساکھ کو تباہ کیا، پاکستان کو اس وقت اتحاد کے ذریعے ہی آگے لے جایا جاسکتا ہے۔

وزیراعلیٰ پنجاب کا کہنا ہے کہ وطن کی مٹی ہم سے ذاتی اختلافات چھوڑ کر ایک ہونے کا تقاضا کررہی ہے، بد قسمتی سے اپوزیشن قومی یکجہتی کے منافی ایجنڈا لے کر چل رہی ہے۔

انکا کہنا ہے کہ اپوزیشن صرف انتشار پھیلا کر ترقی کے سفر کو روکنے کے درپے ہے، انہیں پتہ ہے کہ وزیراعظم عمران خان کو عوام کی حمایت حاصل ہے۔

عثمان بزدار نے کہا کہ 2023 کے بعد بھی عوام کی حمایت سے تحریک انصاف دوبارہ اقتدارمیں آئے گی، پاکستان کے 22کروڑ عوام کو وزیراعظم عمران خان کی شفاف قیادت پر پورا اعتماد ہے۔

انہوں نے مزید کہا کہ وزیر اعظم عمران خان ملک کو درپیش اندرونی و بیرونی چیلنجز کا پامردی سے مقابلہ کررہے ہیں، پی ٹی آئی کی حکومت عوامی خدمت اور قومی ترقی کے مشن پر عمل پیرا ہے۔