عرب فوجی اتحاد نے یمن کے صوبے مارب میں مختلف فضائی حملوں کے دوران ایران کی حمایت یافتہ حوثی ملیشیاء کے 90 جنگجو ہلاک کرنے کا دعویٰ کیا ہے۔

ترجمان عرب اتحاد کے مطابق یمن کے شمالی صوبے مارب میں حوثی باغیوں کے ٹھکانوں پر گزشتہ 24 گھنٹوں میں 27 فضائی حملے کئے گئے ہیں، جس کے دوران حوثی ملیشیاء کے90 اراکین ہلاک اور ان کی 13 فوجی گاڑیوں کو مکمل طور پر تباہ کر دیا گیا ہے۔

میڈیا رپورٹس کے مطابق حوثی باغیوں کے امارات کے دارالحکومت ابو ظہبی پر حملوں کے بعد عرب اتحاد کی یمن میں کاروائیوں میں اضافہ کر دیا گیا ہے۔ دوسری جانب حوثی ملیشیا نے بھی ستمبر2021ءکے بعد سےیمن کے شمال میں حکومت کے آخری گڑھ صوبہ مارب کے صوبائی دارالحکومت پر قبضہ کرنے کی کوششیں تیز کردی ہیں۔

عرب اتحاد کی جانب سے دعویٰ کیا جا رہا ہے کہ ان کی جانب سے کی جانے والی فوجی کاروائیوں میں عام شہریوں کی جان اور املاک کے تحفظ کیلئے پیشگی اقدامات کئے جاتے ہیں، جبکہ حوثی ملیشیاء عام شہریوں پر بھی حملے کر رہی ہیں۔