وفاقی وزیر داخلہ شیخ رشید نے کہا ہے کہ امریکی ناظم الامور نے الگ الگ ملاقاتیں کر کے ثابت کر دیا ہے کہ ن اور ش الگ الگ ہیں اور الیکشن سے قبل تیسری ن لیگ بھی وجود میں آ جائے گی۔
آج اسلام آباد میں صحافیوں سے گفتگو کرتے ہوئے شیخ رشید کا پی ڈی ایم کے احتجاج کے حوالے سے کہنا تھا کہ اگر قانون ہاتھ میں نہیں لیا گیا تو کوئی کارروائی نہیں ہوگی۔تاہم انہوں نے خبردار بھی کیا کہ اگر کسی نے دنگا فساد کیا تو وہ اپنے لیے گڑھا کھودے گا۔شہباز شریف کی اہم شخصیات سے ملاقاتوں کے حوالے سے پوچھے گئے سوال پر شیخ رشید کا کہنا تھا کہ ملاقاتیں تو اچھی بات ہے۔ملاقاتوں کے بعد باتیں بھی سامنے آنی چاہییں۔شیخ رشید کا مزید کہنا تھا کہ امریکی ناظم الامور سے مریم نواز اور شہباز شریف کی الگ الگ ملاقات یہ اس با ت کا ثبوت ہے کہ وہ دو پارٹیاں ہیں۔
شیخ رشید کا مزید کہنا تھا کہ خوشی ہے پی ڈی ایم نے احتجاج کیلئے میرے شہر کا انتخاب کیا، پی ڈی ایم شوق سے احتجاج کرے، الیکشن سے پہلے اپوزیشن دنگا فساد کرنا چاہتی ہے۔
