وفاقی وزیر مراد سعید کا کہنا ہے کہ سابق حکمران ملک کھانےکیلئے آئے ہیں کھانے پر اکٹھا ہوتے ہیں ملک کی فکر ہے تو لندن دوائی لینے جانے والا وطن واپس کیوں نہیں آ رہا؟۔

سینیٹ اجلاس میں اظہار خیال کرتے ہوئے مراد سعید نے کہا کہ ملک کا خزانہ لوٹنے والے لندن میں ہوتے ہیں، یہ لوگ ملک کھانےکے لیے آئے ہیں کھانے پر اکٹھا ہوتے ہیں،انہیں ملک کی فکر ہے تو لندن دوائی لینے والا وطن واپس کیوں نہیں آ رہا۔مراد سعید نے کہا کہ گزشتہ حکمرانوں نے ملکی معیشت کو آئی سی یو پر منتقل کیا تھا، آج ہم معیشت کو خسارے سے نکل رہے ہیں۔

وزیر مواصلات کا کہنا تھا کہ سابق حکمرانوں کا پیٹ بھی خراب ہوتا تو علاج کے لئے لندن چلے جاتے تھے، پی آئی اےکا جہاز ان کے لئے وہاں مہینوں کھڑا رہتا تھا۔

مراد سعید نے کہا کہ پانچ دہائیوں بعد پاکستان میں ڈیم بننے جا رہے ہیں، احساس پروگرام کے تحت غریب کی مدد کی جا رہی ہے۔وفاقی وزیر مواصلات نے اپوزیشن کا حوالہ دیتے ہوئےے کہا کہ یہ پاکستان اسٹیل، ریلوے اور مواصلات خسارے میں چھوڑ کر گئے تھے، آج پہلی بار ریلوے منافع بخش ادارہ بن گیا ہے۔ہم صحت انصاف کارڈ ،بہترین خارجہ پالیسی اور کامیاب جوان پروگرام کی بات کرتے ہیں تو ایک ہی جواب ملتا ہے ہم نے سڑکیں بنائی تھی۔

مراد سعید نے مزید کہا کہ جب یہاں مہنگی سڑکیں بن رہی تھیں تب لندن میں جائیدادیں بھی بن رہی تھیں، ماضی میں 41 کروڑ 10 لاکھ روپے فی کلو میٹر سڑک بن رہی تھی، آج مہنگائی کے باوجود ہم سستی سڑکیں بنا رہے ہیں۔