وزیراعظم عمران خان نے دورہ نوشکی میں رینجرز اور ایف سی کے جوانوں سے خطاب کرتے ہوئے ان کی تنخواہوں میں 15 فیصد اضافے کا اعلان کیا ہے۔

تفصیلات کے مطابق آج وزیراعظم عمران خان اور آرمی چیف جنرل قمر جاوید باجوہ ایف سی اور رینجرز کے جوانوں سے ملاقات کرنے کیلئے نوشکی پہنچے۔ وزیرداخلہ شیخ رشید احمد، وزیر خارجہ شاہ محمود قریشی اور وزیر اطلاعات فواد چوہدری بھی وزیر اعظم کے ہمراہ تھے۔ نوشکی آمد پر وزیراعلیٰ بلوچستان عبدالقدوس بزنجو نے ان کا استقبال کیا۔

نوشکی میں فوجی جوانوں سے خطاب کرتے ہوئے وزیراعظم عمران خان نےکہا کہ دہشت گردی کے خلاف لڑنے والے ہمارے  جوان اکیلے نہیں ہیں،  پوری قوم ان کے ساتھ کھڑی ہے، شہادت بہت بڑا رتبہ ہے اور یہ مسلمان کیلئے بڑا اعزاز ہے۔ انہوں نے کہا کہ  دہشت گردی کے خلاف جنگ میں پاک فوج نے جو مظاہرہ کیا اس کی مثال نہیں ملتی۔ اس موقع پر وزیراعظم نے رینجرز اور ایف سی کی تنخواہوں میں 15 فیصد اضافے کا بھی اعلان کیا۔

تنخواہ دار طبقے کی مشکلات کا پورا احساس ہے

وزیراعظم نے کہا کہ  یہ مہنگائی کا دور ہے جس کا مجھے پورا علم ہے، دنیا بھر میں مہنگائی کا سیلاب آیا ہوا ہے، برطانیہ میں بھی 40 سال بعد مہنگائی بلند ترین سطح پر ہے، مجھے پورا احساس ہے کہ ہمارا تنخواہ دار طبقہ سب سے زیادہ مشکل میں ہے، میں یقین دلاتا ہوں کہ ایسے اقدام کررہے ہیں کہ آمدنی میں اضافہ ہو۔

وزیراعظم کا کہناتھا  کہ پٹرول مہنگا ہوگیا ہے اس کے تمام چیزوں پر اثرات مرتب ہوتے ہیں، حکومت کی آمدن بڑھنے کے ساتھ ہی  تنخواہ داروں کی آمدنی بڑھائیں گے۔ اس موقع پر انہوں نے ایک بار پھر  کارپورٹ سیکٹر سے درخواست کی کہ وہ اپنے ملازمین کی تنخواہوں میں اضافہ کریں

چمن سے کراچی ہائی وے بنارہے ہیں

عمران خان نے کہا کہ کسی بھی جمہوری حکومت نے بلوچستان کو اتنے فنڈ نہیں دئیے جتنے فنڈ ہماری حکومت نے دئیے ہیں، انہوں نے کہا کہ  چمن سے کراچی تک براستہ کوئٹہ ایک ہائی وے بنارہے ہیں جو سب سے بڑا پروجیکٹ ہے اس سے صوبے کے لوگوں کو بہت فائدہ ہوگا ۔ اس منصوبے کیلئے ہم نے رقم بھی مختص کردی ہے۔

سی پیک کے اگلے فیز میں سب سے زیادہ فائدہ بلوچستان کو ہوگا

وزیراعظم کا کہنا تھا کہ ہم بلوچستان کیلئے وہ کام کرجائیں گے کہ کوئی  بھی انہیں حکومت کے خلاف کھڑا نہیں کرسکے گا اور دہشت گردوں اور دشمن کی بات بھی پھر کوئی نہیں سنے گا۔ انہوں نے کہا کہ  چینی صدر نے یقین دہانی کرائی ہے کہ سی پیک کے اگلے فیز میں سب سے زیادہ فائدہ بلوچستان کا ہوگا، دوسرا فیز انڈسٹریلائزیشن  کاہے جس میں اسپیشل اکنامک زون بھی شامل ہے۔

عمران خان کا مزید کہنا تھا کہ یہ فیز ٹیکنالوجی کا ہے، اس کے  ساتھ چین زراعت میں بھی  ہماری مدد کررہا ہے، اگر چین کی مدد سے ہماری زراعت بڑھ گئی تو ہم  برآمدات میں اضافہ کر سکیں گے، کیونکہ ہماری اکثریت زراعت پر منحصر ہے۔

نوشکی میں وزیراعظم عمران خان اور آرمی چیف جنرل قمر جاوید باجوہ نے فوجی جوانوں سے ملاقات بھی کی۔

Prime Minister Imran Khan and Army Chief General Qamar Javed Bajwa at Nushki Balochistan pic.twitter.com/tKHTsOKS52

— Malik Ali Raza (@MalikAliiRaza) February 8, 2022