پنجاب کابینہ نے سالانہ ترقیاتی بجٹ میں 26 ارب روپے کے اضافے کی منظوری دے دی۔
تفصیلات کے مطابق پنجاب حکومت نے ترقیاتی سکیموں سے متعلق بڑا فیصلہ کر لیاہے، کابینہ نے سالانہ ترقیاتی بجٹ میں 26 ارب روپے کے اضافے کی منظوری دے دی جس کے بعد صوبے میں ترقیاتی بجٹ کا حجم 560 سے 586 ارب روپے تک کردیا گیا ہے۔
محکمہ خزانہ پنجاب نے پی اینڈ ڈی بورڈ کو 26 ارب روپے کا مزید بجٹ دے دیاہے، یہ بجٹ 800 سے زائد نظرانداز ہونے والے چھوٹی سکیموں کو دیا جائے گا، ان سکیموں میں عوامی فلاح کے نظرانداز ہونے والے منصوبوں کو فنڈ مل سکے گا۔محکمہ خزانہ پنجاب کے مطابق بجٹ میں کم مختص شدہ فنڈ والی سکیموں کو بھی اب بجٹ مل سکے گا۔ اضافی فنڈ ہونے کی صورت میں یہ بجٹ دیا گیا ہے۔
واضح رہے وزیراعلیٰ پنجاب عثمان بزدار نے بجٹ کی منظوری کے وقت کہا تھا کہ پنجاب کی تاریخ میں پہلی بار ترقیاتی بجٹ میں ریکارڈاضافہ کیاجارہاہے، پہلی بارہرضلع کا علیحدہ ڈویلپمنٹ پیکیج تیارکیاگیاہے، بجٹ میں عام آدمی کوریلیف دینےکےلئےاقدامات تجویزکئےگئے ہیں۔