صدر مملکت ڈاکٹر عارف علوی نے کہا ہے کہ آبادی میں تیزی سے اضافے سے ملک کی سماجی و اقتصادی ترقی پر اثرات مرتب ہو رہے ہیں۔
اسلام آباد – (اے پی پی): جمعے کے روز ایوان صدر میں آبادی میں تیزی سے اضافے پر میڈیا نمائندگان کے ساتھ فکری نشست کے دوران گفتگو کرتے ہوئے صدر مملکت ڈاکٹر عارف علوی نے کہا کہ آبادی میں تیزی سے اضافے سے ملک کی سماجی و اقتصادی ترقی پر اثرات مرتب ہو رہے ہیں، لوگوں میں شعور بیدار کرنے کے لیے قومی سطح پر ایک وسیع البنیاد مہم چلانے کی ضرورت ہے ، میڈیا خاندانی منصوبہ بندی پر رائے عامہ ہموار کرنے ، رویوں میں تبدیلی لانے میں اہم کردار ادا کر سکتا ہے۔انہوں نے کہاکہ ٹیلی ویژن ٹاک شوز، ڈرامہ سیریلز میں آبادی کے مسئلے پر توجہ سود مند ثابت ہو سکتی ہے، آبادی کے مناسب انتظام کیلئے پارلیمانی ارکان کے فعال کردار ، پختہ سیاسی عزم کی ضرورت ہے۔
صدر مملکت نے کہاکہ عوامی آگاہی کیلئے آبادی میں اضافے پر پارلیمانی کاکس کی کارروائی کو مناسب طریقے سے اجاگر کیا جائے، میڈیا پبلک سروس پیغامات کے ذریعے ملک میں آبادی کی تشویشناک شرح کے بارے میں بیداری پیدا کرے ۔انہوں نے کہاکہ خاندانی منصوبہ بندی اور بچوں کی پیدائش میں مناسب وقفہ رکھنے کی ضروت ہے ، اسلام زور دیتا ہے کہ مائیں اپنے بچوں کو دو سال تک اپنا دودھ پلائیں،بچوں کو دو سال تک ماں کا دودھ پلانے سے بچوں میں ذہنی و جسمانی کمزوری ، غذائیت کی کمی پر قابو پایا جا سکتا ہے۔
صدر مملکت ڈاکٹر عارف علوی کی آبادی میں تیز اضافے پر میڈیا نمائندگان کے ساتھ فکری نشست
آبادی میں تیزی سے اضافے سے ملک کی سماجی و اقتصادی ترقی پر اثرات مرتب ہو رہے ہیں ، صدر مملکت
لوگوں میں شعور بیدار کرنے کے لیے قومی سطح پر ایک وسیع البنیاد مہم چلانے کی ضرورت ہے ، صدر مملکت pic.twitter.com/hF80P3bKMh
— The President of Pakistan (@PresOfPakistan) February 18, 2022
وزیراعظم کے معاون خصوصی برائے صحت ڈاکٹر فیصل سطان نے کہا کہ آبادی میں بے ہنگم اضافہ قومی سلامتی کا مسئلہ بن سکتا ہے، آبادی میں اضافے سے نئی نسل کو تعلیم اور صحت کی سہولیات کی کمی کا سامنا کرنا پڑ سکتا ہے ۔انہوں نے بتایا کہ رہنمائی کی کمی ، مانع حمل مصنوعات کی عدم دستیابی کی وجہ سے پاکستان میں 40 لاکھ ان چاہے حمل ہوتے ہیں۔
