بھارتی ریاست کرناٹک کے تعلیمی اداروں میں حجاب پر پابندی کے خلاف احتجاج کرنے والی 10 طالبات کے خلاف مقدمہ درج کر دیا گیا ہے۔
بھارتی میڈیا کے مطابق یہ مقدمہ ریاست کرناٹک کے سرکاری کالج میں باحجاب طالبات کو کالج داخل ہونے سے روکنے پر احتجاج کرنے والی 10 طالبات کیخلاف درج کیا گیا ہے۔ میڈیا رپورٹس کے مطابق ریاست کرناٹک کے علاقے تمکور کی پولیس نے ایمپریس گورنمنٹ کالج کے سامنے حجاب پر پابندی کے خلاف احتجاج کرنے والی طالبات کے خلاف مختلف دفعات کے تحت درج کیا ہے، جس میں موقف اپنایا گیا ہے کہ یہ طالبات دفعہ 144 کی خلاف ورزی کی بھی مرتکب ہوئی ہیں۔
واضح رہے کہ بھارتی ریاست کرناٹک کے بعض تعلیمی اداروں کی انتظامیہ نے یونیفارم پر پابندی کی آڑ میں مسلمان طالبات کے حجاب پر پابندی عائد کر دی تھی، جسے مسلمان طالبات نے کرناٹک ہائیکورٹ میں چیلنج کیا تھا۔ گزشتہ ہفتے کرناٹک ہائیکورٹ نے بھی متنازع حکم جاری کرتے ہوئے کہا تھا کہ فیصلہ آنے تک مسلمان طالبات حجاب نہ کریں، اس کے بعد باحجاب طالبات اور خواتین اساتذہ کے بھی کالج کے گیٹ پر روک کر ان کت حجاب اتروا لئے گئے تھے۔
حجاب پر پابندی کا معاملہ کرناٹک کے علاوہ مدھیہ پردیش سمیت دیگر ریاستوں میں بھی پھیل رہا ہے،اور ملک بھر میں اس کے خلاف احتجاج کا سلسلہ بھی جاری ہے۔