یوکرین غیر مشروط طور پر روس کیساتھ مذاکرات کیلئے تیار ہو گیا ہے، جبکہ روس بھی یوکرین کےہتھیار ڈالنے کی شرط سے دستبردار ہو گیا ہے۔

عالمی خبر رساں ادارے کی رپورٹ کے مطابق یوکرین نے روس کیساتھ پیشگی شرائط کے بغیر مذاکرات کیلئے حامی بھر دی ہے، اور یہ مذاکرات ہمسایہ ممالک بیلاروس کی سرحد پر ہوں گے۔

میڈیا رپورٹس کے مطابق مذاکرات کے ابتدائی دور میں دونوں ممالک کے وفود پیشگی شرائط کے بغیر مذاکرات کریں گے، جس کے بعد اعلیٰ سطح کی ملاقات بھی متوقع ہے۔

واضح رہے کہ اس سے قبل روس نے مذاکرات سے قبل یوکرین سے ہتھیار ڈالنے کی شرط رکھی تھی، اور مذاکرات کیلئے اپنا وفد بھی بیلا روس بھیجا تھا۔ اب یوکرین کے صدر کاکہنا ہے کہ امن کیلئے مذاکرات ضرور ہونے چاہئیں، لیکن اس کا مقام بیلاروس نہیں بلکہ کوئی اور ملک ہونا چاہیے، میڈیا رپورٹس کے مطابق یوکرین کی جانب سے استنبول کا نام بھی تجویز کیا گیا تھا۔

یاد رہے کہ روس اور یوکرین کے درمیان 2014ء میں جنگ بندی کیلئے منسک نامی امن معاہدہ بھی بیلاروس میں ہوا تھا، جس کے متعلق یوکرین کا کہنا ہے کہ روس نے اس پر عملدرآمد نہیں کیا۔

تازہ ترین اطلاعات کے مطابق روس کی فوجیں یوکرین  کےدارالحکومت کیف میں پارلیمنٹ سے صرف 9 کلومیٹر کی دوری پر موجود ہیں، جبکہ یوکرین کے دوسرے بڑے شہر خارکیف میں روسی افواج داخل ہو چکی ہیں، جہاں انہیں  یوکرین کی فوج سخت مزاحمت کا سامنا ہے۔

واضح رہے کہ دونوں ممالک کی حالیہ مذاکرات کیلئے آمادگی دوست ممالک کی کاوشوں سے ممکن ہوئی ہے، اس سے قبل گزشتہ روز مذاکرات کیلئے کوششیں ناکام ہونے کے بعد روس نے یوکرین میں فوجی کاروائیاں تیز کر دی تھیں۔