پاکستانی کرکٹ ٹیم کے کپتان بابر اعظم نے میچ کے بعدٹیم کے ساتھ سیشن میں کہا کہ کھلاڑی زیادہ پر جوش نہ ہوں، ہم مل کر خوشی منائیں گے لیکن ابھی اپنی توجہ ورلڈ کپ جیتنے پر مرکوز رکھیں۔
کل کے پاک بھارت میچ میں بھارت کو عبرت ناک شکست کے بعد ڈریسنگ روم میں ٹیم کے ساتھ میٹنگ میں کپتان بابراعظم نے کہا کہ ہم کسی بھی وقت آرام سے نہیں بیٹھیں گے، جو بیٹنگ، باؤلنگ اور فیلڈنگ کرے وہ اپنا سو فیصد دے اور ایسا نہ ہو کہ ہم اپنی توجہ ہٹا کر صرف گھوم پھر رہے ہوں، جشن منا رہے ہوں کیونکہ یہ ہماری عادت ہے، جسے ہم نے تبدیل کرنا ہے، یہ جلد تبدیل ہوگی اور یہ ہم ہی کریں گے۔
ان کا کہنا تھا کہ ابھی تو آغاز ہے، میچ میں فتح کی خوشی ضرورمنائیں لیکن زیادہ پرجوش نہ ہوں، کہیں ایسا نہ ہو کہ ہم کل کا دن بھی صرف خوش ہوتے رہیں، ہمارے آگے ابھی کافی میچز ہیں، ہمیں ان پر ہمیں توجہ دینی ہے، ہم مل کر خوشی منائیں گے لیکن ابھی ہماری توجہ ورلڈ کپ جیتنے پر ہونی چاہیے۔
کپتان بابراعظم نے بھارت کے خلاف جیت میں ٹیم کی کارکردگی کو سراہتے ہوئے کہا کہ یہ کسی کی انفرادی پرفارمنس نہیں تھی، ہم بطور ٹیم جیتے ہیں اور یہ بطور ٹیم کارکردگی دکھانا ہم نے کسی صورت نہیں چھوڑنا۔
یاد رہے کہ کل کے میچ میں پاکستان نے بھارت کو عبرتناک شکست سے دوچار کیا تھا، بھارت کا 152 رنز کا ٹارگٹ پاکستان کے اوپنر بلے بازوں نے ہی 17 ویں میں پورا کرلیا تھا۔
