یوکرین کے صدر ولادی میر زیلنسکی نے کہا ہے کہ یورپی یونین اپنے عمل اور اقدامات سے ثابت کرے کہ وہ ہمارے کھڑی ہے۔
یوکرینی میڈیا نے دعویٰ کیا ہے کہ یوکرین کی یورپی یونین میں شمولیت کیلئے درخواست منظور کر لی گئی ہے، اور اس کیلئے یوکرین کو خصوصی طریقہ کار کی بھی اجازت دے دی گئی ہے۔
یاد رہے کہ گزشتہ روز یوکرینی حکام نے یورپی یونین میں شمولیت کی باضابطہ درخواست پر دستخط کئے تھے۔
Ukraine’s Zelenskiy tells EU: ‘Prove that you are with us’ https://t.co/OVjmYEs35o pic.twitter.com/3thtYxrd4Z
— Reuters World (@ReutersWorld) March 1, 2022
عالمی نشریاتی ادارے کی رپورٹ کے مطابق یورپی یونین کی پارلیمنٹ کے ہنگامی اجلاس سے یوکرین کے صدر ولادی میر زیلنسکی نے ورچوئل خطاب کیا۔ یوکرینی صدر کے خطاب پر اراکین پارلیمنٹ نے روس کے سامنے ڈٹ جانے پر یوکرینی صدر کو کھڑے ہو کر خراج تحسین پیش کیا۔
اپنے خطاب میں یوکرینی صدر کا کہنا تھا کہ اس وقت ہمارے ملک کی صورتحال یہ ہے کہ روسی افواج نے تمام بڑے شہروں کو بلاک کر دیا ہے، لیکن ہم ہمت نہیں ہاریں گے، اپنی زمین کا دفاع کریں گے۔انہوں نے کہا کہ دنیا کی کوئی طاقت ہمیں توڑ نہیں سکتی، ہم مضبوط ہیں، کیونکہ ہم یوکرینی ہیں، ہم اپنے حقوق اور اپنی بقاء کی جنگ لڑ رہے ہیں۔
ولادی میر زیلنسکی نے نیٹو اور مغربی ممالک سے شکوہ کیا کہ ہمیں روس کیخلاف جنگ کیلئے تنہا چھوڑ دیا گیا ہے، یورپی یونین کو اپنے عمل اور اقدامات سے ثابت کرنا ہوگا کہ وہ ہمارے ساتھ کھڑی ہے یا نہیں۔
یاد رہے کہ گزشتہ مہینے بھی یوکرین کے صدر نے نیٹو ممالک سے شکوہ کرتے ہوئے کہا تھا کہ انکے بیانات کے برعکس یوکرین کو روس کیخلاف جنگ میں تنہا چھوڑ دیا گیا ہے۔ انہوں نے بیرون ملک یو کسی محفوظ مقام پر منتقلی کی امریکی پیشکش کو بھی مسترد کرتے ہوئے کہا تھا کہ ہمیں لڑنے کیلئے ہتھیار چاہئیں، فرار کیلئے گاڑی نہیں۔
