روس کے یوکرین پر حملے کے بعد دنیا بھر میں سونے کی قیمتیں عدم استحکام کا شکار ہیں۔

سندھ صرافہ بازار جیولرز ایسوسی ایشن کے مطابق آج پاکستان میں 50 روپے اضافے کے بعد فی تولہ سونےکی قیمت ایک لاکھ 28 ہزار 800 روپے، جبکہ 10 گرام سونے کی قیمت 43 روپے اضافے کے بعد ایک لاکھ 10 ہزار 425 روپے ہو گئی ہے۔

عالمی صرافہ مارکیٹ میں بھی سونے کی قیمت میں اضافہ ریکارڈ کیا گیا ہے، جہاں فی اونس سونے کی قیمت 6 ڈالر کے اضافے کے بعد 1928 ڈالر پر پہنچ گئی ہے۔

یاد رہے کہ گذشتہ روز بھی پاکستان میں فی تولہ سونے کی قیمت میں 150 روپے کا اضافہ ہوا تھا، علاوہ ازیں روس کے یوکرین پر حملے کے روز یعنی 24 فروری کو پاکستان میں فی تولہ سونے کی قیمت میں 3400 روپے کا اضافہ جبکہ اگلے ہی روز 2800 روپے کی کمی ریکارڈ کی گئی تھی۔