وزیر اعظم کے معاون خصوصی برائے سیاسی روابط شہباز گل  نے چیئرمین بلاول بھٹو کی جانب سے وزیراعظم کے استعفےکے مطالبے پر ردعمل دیتے ہوے کہا بلاول بھٹو کی صحت کارڈ بھیجیں گے  وہ اپنا  علاج کراوئیں۔

تفصیلات کے مطابق  نجی جینل سے  گفتگو کرتے ہوئے معاون خصوصی برائے سیاسی روابط شہباز گل نے کہا کہ بلاول بھٹو دھرنا دینے والے نہیں بس شو شا کی حد تک ہیں،انہوں نے کہا کہ استعفے کے مطالبے پر ہم بلاول بھٹو کو ہیلتھ کارڈ بھیجیں گے کہ یہ اپنا علاج کرائیں، ان کی نیندیں حرام ہوچکی ہیں اب ان کے پاس بیچنے کے لیے کچھ نہیں ہے۔

شہباز گل کا مزید کہنا تھا کہ اگر انہوں نے دھرنا دیا تو ہم ان کو چائے پانی پلائیں گے، بلاول زرداری کو اسلام آباد میں ویلکم بھی کریں گے، یہ بہت بار پانچ اور دس دن کی باتیں کرچکے ہیں۔

صحافی کے سوال پر معاون خصوصی کا کہنا تھا  کہ انٹرنیشنل مارکیٹ میں تیل کی قیمت 119 ڈالر فی بیرل ہوچکی ہے، حکومت تقریباً 55 روپے فی لیٹر کم قیمت پر پیٹرول، ڈیزل مہیا کررہی ہے۔

واضح رہے کہ چیئرمین پیپلزپارٹی بلاول بھٹو بلاول بھٹو زرداری نے پنجاب کے شہر بہاولپور میں عوامی مارچ سے خطاب کرتے ہوئے کہا کہ عمران خان کے پاس 5 دن کی ڈیڈ لائن ہے، وہ اس دوران خود ہی استعفیٰ دے دیں،اگر آپ نے استعفیٰ نہ دیا تو پانچ دن بعد ہم اسلام آباد پہنچ کر عدم اعتماد لائیں گے۔