اپوزیشن کی تحریک عدم اعتماد میں جہانگیرترین گروپ کے کردار پر پاکستان تحریک انصاف کا موقف سامنے آ گیا ہے۔

عمر کوٹ میں سندھ حقوق مارچ سے خطاب کرتے ہوئے پاکستان تحریک انصاف کے وائس چیئرمین شاہ محمود قریشی نے کہا کہ تحریک عدم اعتماد کی ہوا نکل چکی ہے، پوری پارلیمنٹ کو عمران خان پر مکمل اعتماد ہے۔ وزیر خارجہ کا کہنا تھا کہ تحریک انصاف میں ترین گروپ کا کوئی وجود نہیں ہے، صرف عمران خان گروپ ہے، اور یہی تحریک انصاف ہے۔ انہوں نے کہا کہ اتحادی ہمارے ساتھ ہیں، ایم کیو ایم بھی ہمارے مارچ میں بھرپور شرکت کر رہی ہے۔ ق لیگ نے بھی عمران خان کے ساتھ عہد نبھانے کا اعلان کیا ہے۔

علاوہ ازیں میرپور خاص میں پریس کانفرنس کرتے ہوئے شاہ محمود قریشی کا کہنا تھا کہ ہمیں اعتماد ہے ہمارے ایم این ایز اپنے موقف پر ڈٹے رہیں گے، زر اور زرداری کی سیاست ان کو خریدناچاہتے ہیں لیکن انہوں معلوم ہونا چاہیے کہ یہ بکاؤ مال نہیں۔

انہوں نے کہا کہ نوٹ پی پی کا ووٹ عمران خان کا، یہ فارمولا بُرا نہیں، جسے تحریک انصاف کو چھوڑنا ہے وہ آج ہی چھوڑ جائے۔