یوکرین کے صدر ولادی میر زیلنسکی نے یورپی ممالک سے جنگ کی حالت میں یوکرین کی فوجی امداد بڑھانے کا مطالبہ کیا ہے۔

عالمی خبر رساں ایجنسی کی رپورٹ کے مطابق یوکرین کے صدر نے جمعرات کے روز پریس کانفرنس کرتے ہوئے کہا کہ اگر یوکرین پر روس نے قبضہ کر لیا تو اس کے بعد لیٹویا، لیتھوانیا اور ایسٹونیا کی باری ہے۔ انہوں نے یورپی ممالک کو مخاطب کرتے ہوئے کہا کہ اگر آپ کے پاس دفاعی صلاحیت نہیں ہے تو ہمیں روس کے مقابلے کیلئے طیارے اور فوجی امداد فراہم کریں۔ یوکرینی صدر نے یورپی ممالک سے مطالبہ کیا کہ روسی صدر کیساتھ براہ راست مذاکرات شروع کئے جائیں، یہی اس مسئلے کا واحد حل ہے۔

یاد رہے کہ گزشتہ روزروسی وزیر خارجہ نے اپنے ایک بیان میں کہا تھا کہ  یوکرین کی حکومت کیساتھ مذاکرات جاری رہیں گے، لیکن اس کیساتھ یوکرین کی فوجی طاقت کو ہر قیمت پر تباہ کیا جائے گا۔ انہوں نے کہا کہ مغربی ممالک یوکرین کو مسلح کرنے کی کوششیں کرتے رہے ہیں، مغربی ممالک نے یوکرین میں فوجی اڈے بنائے، انہیں فوجی تربیت دی، تاکہ یوکرین کو روس کیخلاف تیار کیا جا سکے۔