پاکستان اور سعودی عرب کی مشترکہ تربیتی فوجی مشقیں الصمصام 8 اختتام پذیر نیشنل کاؤنٹر ٹیررازم سنٹر پبی میں اختتام پذیر ہوگئیں ہیں۔

پاک فوج کے شعبہ تعلقات عامہ (آئی ایس پی آر) کے مطابق پاک فوج اور رائل سعودی لینڈ فورسز کی مشترکہ تربیتی مشقیں الصمصام 8 نیشنل کاؤنٹر ٹیررازم سنٹر پبی میں اختتام پذیر ہوگئیں ہیں۔آئی ایس پی آر نے بتایا کہ دو ہفتے جاری رہنے والی مشترکہ مشقیں رائل سعودی لینڈ فورسز اور پاک فوج کے درمیان دو طرفہ فوجی مشقوں کے سلسلے کا حصہ تھیں۔

آئی ایس پی آر کا کہنا ہے کہ مشترکہ مشقیں انسداد دہشت گردی کی کارروائیوں پر مرکوز تھیں، جس میں سرچ، جنگی گشت اور دھماکا خیز آلات تلف کرنے کی مشقیں شامل تھیں۔آئی ایس پی آر کے مطابق مشقوں کے دوران آپریشنل صلاحیتوں اور ایک دوسرے کے تجربات سے استفادہ کرنے کا موقع ملا ہے۔

آئی ایس پی آر نے بتایا کہ تقریب میں منگلا کور کے کمانڈر لیفٹیننٹ جنرل شاہین مظہر محمود اور رائل سعودی لینڈ فورسز کے میجر جنرل عبداللہ عید العتیبی نے شرکت کی اور اسکے علاوہ پاکستان میں سعودی عرب کے سفیر نواف سعید المالکی نے بھی اپنی شرکت کو یقینی بنایا تھا۔