قائد حزب اختلاف میاں شہباز شریف نے سربراہ پی ڈی ایم کے ہمراہ پیپلز پارٹی کے شریک چیئرمین سے ملاقات کی، جس میں اپوزیشن قیادت نے وزیراعظم کیخلاف تحریک عدم اعتماد کی حتمی تاریخ طے کر لی ہے۔

اپوزیشن جماعتوں کی ملاقات میں یوسف رضا گیلانی، خواجہ آصف، وزیراعلیٰ سندھ مراد علی شاہ، شاہد خاقان عباسی، سید خورشید شاہ، رانا ثناءاللہ، سید نوید قمر، احسن اقبال، سردار ایاز صادق، خواجہ سعد رفیق، مریم اورنگزیب اور مرتضیٰ وہاب  بھی موجود تھے۔

ذرائع کا کہنا ہے کہ اپوزيشن جماعتوں کی مشاورتی میٹنگ میں عمران خان کے خلاف عدم اعتماد کی تحریک لانےکی تاریخ  طےکرلی گئی ہے، جس کا اعلان جلدکیا جائےگا۔

اجلاس کے بعد (ن) لیگ کے رہنما رانا ثناء اللہ نے میڈیا سے گفتگو کرتے ہوئےکہا کہ 100 فیصد یقین ہے کہ تحریک عدم اعتماد کامیاب ہوگی، ہم اس مصیبت سے جلد نجات حاصل کرلیں گے۔ علاوہ ازیں جے یو آئی کے رہنما اکرم درانی نے کہاکہ کل پرسوں تک تمام تفصیلات سامنے آ جائیں گی۔

یاد رہے کہ سربراہ پی ڈی ایم مولانا فضل الرحمن اور پیپلز پارٹی کے رہنماء خورشید شاہ کا اجلاس سے قبل کہنا تھا کہ اس میٹنگ میں تحریک اعتماد کیلئے حتمی تاریخ طے کر لی جائے گی۔