فلسطین میں بھارت کے سفیر موکل آریہ اپنے دفتر میں مردہ پائے گئے۔
بھارتی میڈیا کے مطابق فلسطین میں بھارت کے خصوصی ایلچی 36 سالہ موکل آریہ نے گزشتہ برس ہی اپنی ذمہ داریاں سنبھالی تھیں، جو آج اپنے دفتر میں مردہ حالت میں پائے گئے۔
میڈیا رپورٹس کے مطابق بھارت کے سفارت کار کی موت کی وجہ کا تاحال تعین نہیں کیا جا سکا ہے۔ سفارتی عملہ جب رملہ میں موجود دفتر پہنچا تو موکل آریہ مردہ حالت میں زمین پر گرے ہوئے تھے، جن کی لاش کو ہسپتال منتقل کر دیا گیا ہے۔
فلسطین اتھارٹی کی وزارت خارجہ نے موکل آریہ کی اچانک موت پر افسوس کا اظہار کرتے ہوئے تحقیقات کا حکم دیا ہے، اور بھارتی وزارت خارجہ کو بھی آگاہ کر دیا گیا۔ لاش کی جلد از جلد نئی دہلی منتقلی کے انتظامات کئے جا رہے ہیں۔
