وزیراعظم عمران خان نے کالعدم تحریک لبیک کے دھرنے سے پیدا ہونے والی صورتحال کے پیش نظر کل قومی سلامتی کمیٹی کا اجلاس طلب کر لیا ہے۔
وفاقی وزیر اطلاعات فواد چوہدری نے اس اجلاس کے متعلق ٹوئٹ کرتے ہوئے کہا کہ کالعدم جماعت کی غیر قانونی سرگرمیوں سے پیدا ہونیوالی صورتحال کے پیش نظر وزیر اعظم عمران خان نے کل قومی سلامتی کمیٹی کا اجلاس طلب کیا ہے، اس اجلاس میں قومی سلامتی سے متعلق دیگر امور بھی زیر غور آئیں گے۔
کالعدم جماعت کی غیر قانونی سرگرمیوں سے پیدا ہونیوالی صورتحال کے پیش نظر وزیر اعظم عمران خان نے کل قومی سلامتی کمیٹی کا اجلاس طلب کیا ہے، اس اجلاس میں قومی سلامتی سے متعلق دیگر امور بھی زیر غور آئیں گے۔
— Ch Fawad Hussain (@fawadchaudhry) October 28, 2021
یاد رہے کہ کل وفاقی کابینہ کے اجلاس میں کالعدم ٹی ایل پی کے مطالبات مسترد کرتے ہوئے حکومت نے ان کے اسلام آباد کی طرف مارچ کے ساتھ آہنی ہاتھوں سے نمٹنے کا فیصلہ کیا تھا، بعد ازاں وفاقی وزیراطلاعات کا میڈیا بریفنگ میں کہنا تھا کہ کالعدم ٹی ایل پی ہمارے صبر کا امتحان نہ لے، کسی مائی کے لال میں جرات نہیں کہ وہ ریاست کو چیلنج کرے۔
اس کے بعد وفاقی وزیر داخلہ کا پریس کانفرنس میں کہنا تھا کہ پنجاب میں 60 روز کیلئے رینجرز تعینات کرنے کا فیصلہ کیا ہے، انہوں نے ٹی ایل پی قیادت کے نام پیغام میں کہا کہ اب بھی کہہ رہا ہوں کہ واپس چلے جائیں ٹی ایل پی پاکستان میں کالعدم ہے، خدشہ ہے کہ کہیں اس پر عالمی پابندیاں نہ لگ جائیں۔
اب سے کچھ دیر قبل وزیر داخلہ شیخ رشید اور وفاقی وزیر مذہبی امور نورالحق قادری کے ٹی ایل پی قیادت کے ساتھ اسلام آباد میں شروع ہونے والے مذاکرات ابھی جاری ہیں۔