پارلیمنٹ لاجز میں جمعیت علمائے اسلام کے محافظ دستے انصار الاسلام کے کارکنوں کی موجودگی پر اسلام آباد پولیس نے آپریشن کرکے رکن قومی اسمبلی سمیت متعدد افراد کو گرفتار کر لیا ہے۔

تفصیلات کے مطابق پارلیمنٹ لاجز میں جمعیت علمائے اسلام کے محافظ دستے انصار الاسلام کی آج تعیناتی کی گئی، جس پر سربراہ جے یو آئی مولانا فضل الرحمان کا کہنا تھا کہ یہ پولیس پی ٹی آئی کی ہے، ہمیں اس پر اعتبار نہیں، ہمیں شبہ ہے کہ تحریک عدم اعتماد کے دوران ہمارے اراکین اسمبلی کو اٹھایا جائے گا، انصارالاسلام ان کی حفاظت کرے گی۔

بعد ازاں پارلیمنٹ لاجز میں  ڈی آئی جی آپریشن کی کمانڈ میں آپریشن کیا گیا، جس کے بعد پولیس کی نفری نے صلاح الدین ایوبی کے لاج کا دروازہ توڑ کر گرفتاریاں شروع کیں۔

اطلاعات کے مطابق پولیس جمعیت علمائے اسلام  کے ایم این اے صلاح الدین ایوبی کو بھی گرفتار کر کے لے گئی جبکہ انصار الاسلام کے  10 سے 12 رضا کاروں کو گرفتار کرلیا گیا ہے۔