روس نے مغربی ممالک کی پابندیوں پر جوابی وار کرتے ہوئے امریکی صدر جوبائیڈن اور کینیڈین وزیراعظم جسٹن ٹروڈو سمیت متعدد امریکی شخصیات پر پابندی عائد کر دی ہے۔
عالمی خبر رساں ادارے کی رپورٹ کے مطابق ماسکو نے کینیڈا کے وزیراعظم جسٹن ٹروڈو اور امریکی صدر جوبائیڈن سمیت متعدد امریکی شخصیات پر پابندی عائد کرتے ہوئے ان کے اثاثے منجمد کر دئیے ہیں۔
روس کی پابندیوں کا شکار ہونے والوں کی فہرست میں امریکی وزیر دفاع لائڈ آسٹن، سی آئی اے کے چیف ولیم برنس اور قومی سلامتی کے میشر جیک سولیون سمیت دیگر شخصیات شامل ہیں۔ امریکی صدر کے بیٹے ہنٹر اور سابق سیکریٹری آف اسٹیٹ ہیلری کلنٹن بھی روس نے پابندیاں عائد کی ہیں۔
روس کی وزارت خارجہ سے جاری بیان میں خبردار کیا گیا ہے کہ اگر مغربی ممالک نے ماسکو پر مزید پابندیاں عائد کیں تو ان کے فوجی افسران، کاروباری حضرات اور صحافیوں پر بھی پابندیاں عائد کی جاسکتی ہیں۔
یاد رہے کہ گزشتہ ماہ یوکرین میں فوجی کاروائی کے بعد امریکہ اور برطانیہ سمیت متعدد مغربی ممالک نے روس کے اداروں، بینکوں، شخصیات اور کمپنیوں پر پابندیاں عائد کر دی تھیں۔