پاکستان تحریک انصاف کے منحرف رکن قومی اسمبلی عبدالغفار وٹو کا بیان سامنے آگیا ہے جس میں انہوں نے اپنی ہی جماعت پر تنقید کی ہے۔

غفار وٹو کا ویڈیو پیغام سامنے آیا ہے جس میں ان کا کہنا ہے کہ میں 2018 میں حلقہ این اے 166 بہاولنگر سے آزاد حیثیت میں جیتا تھا۔غفار وٹو کا مزید کہنا ہے کہ میں نے الیکشن جیتنے کے بعد پی ٹی آئی میں شمولیت اختیار کی، ان ساڑھے 3 سالوں میں اپنے حلقے میں ایک کام بھی نہیں کروا سکا، میرا مطالبہ تھا کہ میرے حلقے کو سی پیک اور موٹروے کے ساتھ لنک کیا جائے۔

عبدالغفار وٹو نے 14 کروڑ روپے لے کر وفاداری تبدیل کرنے کی تردید کرتے ہوئے کہا کہ رشوت لینے اور دینے والا دونوں جہنمی ہیں۔ میں پیسے لینے پر لعنت بھیجتا ہوں۔منحرف قومی اسمبلی نے کہا کہ عمران خان کی حکومت نے عوام سے کئے گئے وعدے پورے نہیں کئے، ان کے حلقے میں کوئی ترقیاتی کام نہیں ہوا۔ تحریک عدم اعتماد پر ووٹ ضمیر کی آواز پر دوں گا۔

واضح رہے کہ تحریک انصاف کے 24 ارکان قومی اسمبلی مبینہ طور پر منحرف ہوگئے ہیں، حکومت کا دعویٰ ہے کہ اپوزیشن نے ان ارکان کو کروڑوں روپے دے کر خریدا ہے۔