وفاقی وزیر خزانہ و محصولات شوکت ترین نے کہا ہے کہ میں لوٹا نہیں ہوں، جو پی ٹی آئی کے ٹکٹ پر منتخب ہو کر کسی دوسری حکومت کیساتھ رہوں۔

آج اسلام آباد میں پریس کانفرنس کرتے ہوئے شوکت ترین نے کہا کہ ملک کی موجودہ سیاسی اور غیر یقینی صورت حال پر لمحہ بہ لمحہ نظر رکھے ہوئے ہوں، غیر یقینی کی صورتحال زیادہ عرصے نہیں چلے گی۔ شوکت ترین کا کہنا تھا کہ پاکستان تحریک انصاف کا سینیٹر منتخب ہوا ہوں، میں لوٹا نہیں ہوں، نئی حکومت کے ساتھ بالکل کام نہیں کروں گا۔

 وزیر خزانہ نے کہا کہ پاکستان کی درآمدات ایک ماہ میں 6 اعشاریہ 3 سے 5 اعشاریہ 2 بلین ڈالر پر آ گئی ہیں، زرعی پیداوار میں بھی اضافہ ہو رہا ہے، ان اعدادوشمار کا مطلب ہے کہ ہماری معیشت مضبوط ہو رہی ہے۔

انہوں نے کہا کہ اسٹیٹ بینک کے زرمبادلہ کے ذخائر 16.6 ارب ڈالر پر موجود ہیں، بجلی پر پانچ روپے ریلیف سے 1840 والا بل 1035 کا ہوگیا، آئی ایم کے ساتھ بھی پٹرول اور بجلی کے ریلیف پر بات چل رہی ہے۔