بھارتی وزارت خارجہ کی جانب سے کہا گیا ہے کہ چینی وزیر خارجہ کے بیان کو مسترد کرتے ہیں۔
یاد رہے کہ چینی وزیر خارجہ و سٹیٹ قونصلر وانگ یی نے اسلام آباد میں او آئی سی کے 48 ویں وزرائے خارجہ اجلاس سے خطاب کرتے ہوئے کہا تھا کہ کشمیر کے متعلق جو اسلامی ممالک کا موقف ہے، وہی چین کا موقف ہے۔
یہ بھی پڑھیے: مسئلہ کشمیر پر جو پاکستان سمیت تمام اسلامی ممالک کا موقف ہے، وہی ہمارا موقف ہے، چین
چینی وزیر خارجہ کے بیان پر ردعمل میں بھارتی وزارت خارجہ کی جانب سے جاری بیان میں کہا گیا ہے کہ چینی وزیر خارجہ کے جموں کشمیر کے متعلق بیان کو نامناسب سمجھتے ہوئے مسترد کرتے ہیں۔ بیان میں کہا گیا ہے کہ جموں کشمیر بھارت کا داخلی معاملہ ہے، چین سمیت کسی ملک کے پاس بھی اس پر تبصرہ کرنے کا کوئی حق نہیں۔
یاد رہے کہ چین کے بھارت کیساتھ لداخ اور اروناچل سمیت مختلف علاقوں میں سرحدی تنازعات چل رہے ہیں، جس کے باعث دونوں ممالک کی افواج کے مابین لداخ میں جھڑپیں بھی ہو چکی ہیں۔