قائد حزب اختلاف میاں شہباز شریف نے کہا ہے کہ جادو ٹونے کیلئے بنی گالا میں روزانہ منوں کے حساب سے گوشت جلایا جا رہا ہے۔
نجی چینل کے ساتھ انٹرویو میں قائد حزب اختلاف میاں شہباز شریف نے کہا ہے کہ میں بلا خوف تردید کہہ رہاہوں کہ بنی گالا میں روزانہ منوں کے حساب سے مرغی کا گوشت جلایا جا رہا ہے۔ انہوں نے کہا کہ یہ امربالمعروف کی بات کرتے ہیں، یہ سب کچھ ایسے وقت میں ہو رہا ہے کہ جب عوام کو کھانے کیلئے دال اور شیر خوار بچوں کو پینے کیلئے دودھ میسر نہیں ہے۔
پروگرام کی اینکر پرسن نے شہباز شریف کو کہا کہ آپ یہ بہت بڑی بات کہہ رہے ہیں، جس پر ان کا کہنا تھا کہ میں یہ بات بڑی ذمہ داری کیساتھ کہہ رہا ہوں، کہ ریاست مدینہ اور امر بالمعروف کی بات کرنے والے یہ سب کر رہے ہیں۔
یاد رہے کہ مسلم لیگ ن کی جانب سے وزیراعظم عمران خان اور خاتون اول پر جادو ٹونے کے الزامات کوئی نئی بات نہیں ہے، اس سے قبل بھی میاں شہباز شریف یہ الزام عائد کرچکے ہیں ہیں کہ یہ حکومت جادو ٹونے سے چلائی جا رہی ہے۔ علاوہ ازیں مسلم لیگ ن کی نائب صدر مریم نواز نے بھی وزیراعظم عمران خان اور خاتون اول پر الزام عائد کیا تھا کہ ملک کے بڑے عہدوں پر تقرریاں جادو ٹونے اور جھاڑ پھونک کے ذریعے کی جا رہی ہیں۔
