پاکستان تحریک انصاف نے وزیراعظم عمران خان کے پریڈ گراؤنڈ جلسے کا شیڈول جاری کر دیا ہے۔
پی ٹی آئی کے سینیٹر فیصل جاوید نے ٹوئٹر پر اپنے بیان میں بتایا کہ کل کے جلسے میں 15 لاکھ افراد شریک ہوں گے، جلسے کا آغاز سہہ پہر تین بجے ہو گا، جبکہ وزیراعظم عمران خان 4 بجے جلسے سے خطاب کریں گے۔
انشاء اللہ جلسہ 3 بجے شروع ہو گا –
وزیراعظم عمران خان 4 بجے کے قریب خطاب کریں گے— Faisal Javed Khan (@FaisalJavedKhan) March 26, 2022
دوسری جانب پریڈ گراؤنڈ میں جلسے کی تیاریاں مکمل کر لی گئی ہیں، اور جلسہ گاہ پر قافلوں کی آمد کا سلسلہ ابھی سے شروع ہو چکا ہے۔ تھوڑی دیر قبل وفاقی وزیر اطلاعات فواد چوہدری اور وزیراعظم کے معاون خصوصی ڈاکٹر شہباز گل نے جلسہ گاہ کا دورہ کیا، اور تیاریوں کا جائزہ لیا۔
اس موقع پر میڈیا سے گفتگو کرتے ہوئے وزیراعظم کے معاون خصوصی ڈاکٹر شہباز گل کا کہنا تھا کہ وزیراعظم عمران خان نے ملک بھر کے دور دراز دیہاتوں کی عوام کو بھی متحرک کر دیا ہے۔
