وفاقی وزیر دفاع پرویز خٹک نے کہا ہے کہ عمران خان کا ساتھ سب کو دینا ہے اور اگر ہم سوئے رہے تو عالمی استعمار ہمارا وہی حال کرے گا جو شام کا حال ہوا، جو انہوں نے لیبیا کے ساتھ کیا۔
اسلام آباد – (اے پی پی): اتوار کے روز اسلام آباد کے پریڈ گراؤنڈ میں امر بالمعروف جلسے سے خطاب کرتے ہوئے وفاقی وزیر دفاع پرویز خٹک نے کہا کہ عمران خان کے ساتھ کھڑے ہیں اور کھڑے رہیں گے، یہ وہ لیڈر ہے جو امت مسلمہ کا دیانتدار قائد ہے جو آپ کو دنیا کے سامنے شرمندہ نہیں کرے گا۔
انہوں نے کہا کہ واحد لیڈرعمران خان ہے جو کھڑا رہے گا اور ہم بھی عمران خان کے ساتھ ہیں۔ پرویز خٹک نے کہا کہ آج عزم کریں کہ اگر آپ ملک میں ایماندار لیڈر اور انصاف کا نظام چاہتے ہیں تو عمران خان وہ واحد لیڈر ہے جو ملک اور قوم کا وقار بلند کرے گا۔ ہمارا لیڈر بہادر ہے جو نہ چوری کرتا ہے اور نہ چوری کرنے دیتا ہے اس لئے بتانا چاہتا ہوں کہ نہ عمران خان جا رہا ہے اور نہ کسی کا باپ اس کو ہٹا سکتا ہے۔ یہ ٹی وی تماشا دیکھ رہے ہیں، جب عوام عمران کے ساتھ کھڑے ہیں تو کوئی بھی سازش نہیں کرسکتا۔
جن کے پاس اختیارات ہیں وہ بھی واپس چلے جائیں گے۔ انہوں نے کہا کہ ہمیں بلیک میل کیا گیا اور بلیک میلرز ایم این اے جو آئے تھے وہ چلے گئے۔ ہمیں فخر ہے کہ پی ٹی آئی کا ایک رکن ہمیں چھوڑ کر نہیں گیا۔ صرف ایک خاتون ہماری تھی جو نہ جانے کیوں چھوڑ کر گئی۔
انہوں نے منحرف اراکین سے کہا کہ آپ کے پاس ووٹ عمران خان کی امانت ہے اب بھی کہتے ہیں کہ تم پچھتاؤ گے۔ عوام آپ کو ایسا سبق سکھائیں گے۔ سندھ ہاؤس میں گھوڑوں کا اصطبل لگایا اور ضمیر فروشی کی منڈی لگائی۔ پرویز خٹک نے کہا کہ جب تک عمران خان زندہ ہے پاکستان کے عوام آپ کے ساتھ کھڑے ہیں۔
