پی ٹی آئی رہنما فواد چوہدری نے کہا ہے کہ ہمیں جلد سیاسی استحکام کی طرف واپس آنا چاہیے عدالت میں جتنا یہ معاملہ طویل ہوگا معیشت کو نقصان ہوگا۔

فواد چوہدری نے کہا ہے کہ اس وقت ملک کو بہتری کی طرف لے کر جانے کا حل نئے انتخابات ہیں اور اپوزیشن کامطالبہ بھی نئےانتخابات کا ہی تھا۔

میڈیا سے بات کرتے ہوئے پاکستان تحریک انصاف کے رہنما فواد چوہدری نے کہا کہ ملک میں عدم استحکام سےمعیشت متاثرہوگی۔ انہوں نے کہا کہ اپوزیشن ایک بےتکی بات پر پھنسی ہوئی ہے یہ کہتے ہیں کہ اسمبلی بحال کرو،عدم اعتمادسےحکومت ختم کرینگے۔

 انہوں نے بتایا کہ چیف جسٹس نے بتایا ہے کہ پورے آئین کو ایک ساتھ دیکھا جاتا ہے کیونکہ آرٹیکل63  اے بھی آئین کا حصہ ہے لیکن اب دیکھنا ہوگا آرٹیکل 63  کی خلاف ورزی ہوئی یا نہیں۔