وزیراعلیٰ پنجاب کے انتخاب کیلئے بلائے گئے اجلاس پر ڈپٹی اسپیکر پنجاب اسمبلی دوست محمد مزاری اور ایڈووکیٹ جنرل پنجاب اویس احمد آمنے سامنے آ گئے ہیں۔

نجی چینل سے گفتگو کرتے ہوئے ایڈووکیٹ جنرل پنجاب احمد اویس نے ڈپٹی اسپیکر پنجاب اسمبلی  دوست محمد مزاری کے دعوے کو غلط قرار دیتے ہوئے کہا کہ میں نے سپریم کورٹ میں آج ہی  الیکشن ہونے کا کوئی بیان نہیں دیا، انہوں نے بتایا کہ میں نے عدالت میں  صرف اتنا کہا تھا کہ  6 اپریل کو پنجاب اسمبلی کا اجلاس آئین و قانون کے مطابق ہوگا، میں نے اس ضمن میں ڈپٹی اسپیکر دوست محمد مزاری کو کوئی مشورہ نہیں دیا۔

واضح رہے کہ نجی چینل سے گفتگو کرتے ہوئے دوست محمد مزاری کا کہنا تھا کہ ایڈووکیٹ جنرل پنجاب نے سپریم کورٹ میں بیان دیا تھا کہ وزیراعلیٰ کے انتخاب کیلئے پنجاب اسمبلی کا اجلاس 6 اپریل کو بلایا جائے گا، میں نے ان کی کمٹمنٹ کے مطابق اجلاس طلب کیا تھا۔