الیکشن کمیشن نے فوری طور پر قومی اور صوبائی اسمبلیوں کی نئی حلقہ بندیوں کے کام کا آغاز کر دیا ہے جبکہ 13 اپریل تک عام انتخابات کے لئے مکمل ایکشن پلان بھی طلب کر لیا، پنجاب میں بلدیاتی انتخابات کے فوری انعقاد کیلئے وفاقی سیکرٹری خزانہ اور چیف سیکرٹری پنجاب کو طلب کرنے کا فیصلہ کیا ہے، این اے 33 ضلع ہنگو میں ضمنی انتخاب کیلئے پولنگ 10 اپریل کی بجائے 17 اپریل کو ہو گی۔
اسلام آباد – (اے پی پی): الیکشن کمیشن کا اہم اجلاس جمعہ کو چیف الیکشن کمشنر سکندر سلطان راجا کی سربراہی میں ہوا جس میں الیکشن کمیشن کے ممبران اور اعلیٰ حکام نے شرکت کی۔ الیکشن کمیشن نے ملک کی سیاسی صورتحال کو سامنے رکھتے ہوئے ڈیجیٹل مردم شماری جس کا ابھی تک فیصلہ نہیں ہو سکااس کااتنظار کئے بغیر 2017ء کی مردم شماری کےاعدادوشمار کی بنیاد پر فوری طور پر قومی اور صوبائی اسمبلیوں کے تمام حلقہ جات کی حلقہ بندی کے کام کا آغاز کردیا ہے۔
کمیشن نے حکم دیا کہ یہ کام ہنگامی بنیادوں پر 4 ماہ کے اندر اندر مکمل کیا جائے۔ کمیشن نے کہا کہ صوبائی حکومتوں کو تحریر کیاجائے کہ تقشے اور دیگر اعدادوشمار فوری طور پر الیکشن کمیشن کو مہیا کریں تاکہ الیکشن کمیشن اس کی تکمیل یقینی بنائے۔ الیکشن کمیشن نےسیکرٹری کمیشن اور سپیشل سیکرٹری کمیشن کو حکم دیاکہ وہ 13 اپریل کو الیکشن کمیشن کے سامنے عام انتخابات کیلئے مکمل ایکشن پلان پیش کریں تاکہ تمام امور کی مانیٹرنگ اور بروقت تکمیل یقینی بنائے۔ الیکشن کمیشن نے کہا کہ ملک میں بہتری، جمہوری عمل کے تسلسل، شفافیت اور قانون کی حکمرانی کیلئے اپنا آئینی کردار ادا کر رہے ہیں اور آئندہ بھی اسے یقینی بنائیں گے۔ اجلاس میں بتایا گیا کہ الیکشن کمیشن نے حکومت پاکستان اور خزانہ ڈویژن کو صوبہ پنجاب میں بلدیاتی انتخابات کے انعقاد کیلئے ضروری فنڈز کیلئے مراسلہ تحریر کیا کیونکہ بلدیاتی انتخابات پہلے ہی تاخیر کا شکار ہو چکے ہیں اس کا مزید التواء آئین اور قانون کی خلاف ورزی ہو گی۔
فنانس ڈویژن کے مشورے کے مطابق الیکشن کمیشن نے ای سی سی کی منظوری کیلئے ضمنی گرانٹ کی سمری بھیجی جو ای سی سی نے منظوری کے بعد کابینہ کو منظوری کیلئے بھجوائی۔ کابینہ نے اس کی منظوری دی اور فنانس ڈویژن نے فنڈز کی منظوری کا مراسلہ بھی الیکشن کمیشن کو ارسال کر دیا کہ الیکشن کمیشن کی ضرورت کے مطابق ضروری فنڈز مہیا کئے جائیں گے لیکن الیکشن کمیشن کے افسران نے فنانس ڈویژن کے افسران سے فنڈز جاری کرنے کے لئے رابطہ کیا تو بتایا گیا کہ حکومت پنجاب نے اپنے حصہ کے فنڈز کے لئے ضروری این او سی جاری نہیں کیا، جس کی وجہ سے بلدیاتی انتخابات کیلئے مطلوبہ فنڈز الیکشن کمیشن کو فراہم نہیں کئے جاسکتے۔ الیکشن کمیشن نے اس بات کا سختی سے نوٹس لیا اور کہا کہ آئینی اورقانونی طورپر الیکشن کمیشن مالی اور انتظامی اعتبار سے خودمختار ادارہ ہے اور حکومت پاکستان اور تمام صوبائی حکومتیں مکمل مالی اور انتظامی تعاون کی پابند ہے لیکن مختلف وجوہات کو جواز بنا کرالیکشن کمیشن کو اپنی آئینی ذمہ داریوں کو پورا کرنے میں رکاوٹیں ڈالی جاتی ہیں۔
الیکشن کمیشن نے مذکورہ بالا وجوہات اور پنجاب میں بلدیاتی انتخابات کے بروقت انعقاد کو یقینی بنانے کیلئے فیصلہ کیا کہ وفاقی سیکرٹری خزانہ اور پنجاب کے چیف سیکرٹری کو طلب کر کے ان دونوں کو سننے کے بعد کوئی مناسب فیصلہ کرے۔
اجلاس میں یہ بھی فیصلہ کیا گیا کہ این اے 33 ضلع ہنگو کے ضمنی انتخاب کے لئے 10 اپریل 2022ء کو ہونے والی پولنگ اب 17 اپریل کو ہو گی۔ اجلاس میں یہ فیصلہ کیا گیا کہ عام انتخابات کیلئے انتخابی فہرستوں کی نظر ثانی کا کام ہنگامی بنیادوں پر مکمل کیا جائے۔
