اسلام آباد ہائیکورٹ نے صحافی محسن بیگ کیخلاف وفاقی وزیر مواصلات مراد سعید کی جانب سے درج کرایا گیا مقدمہ خارج کردیا ہے۔

اسلام آباد ہائیکورٹ نے صحافی محسن بیگ کی درخواست منظور کرتے ہوئے مراد سعید کی مدعیت میں سائبر کرائمز کے تحت ایف آئی آر کو غیر قانونی قرار دے کر خارج کردیا۔

اسلام آباد ہائی کورٹ نے فیصلے میں کہا ہے کہ محسن بیگ کے خلاف پیکا کی سیکشن 20 کے تحت درج مقدمہ خارج کیا گیا، شکایت کنندہ مراد سعید ہتک عزت کے دیگر قوانین کے تحت درخواست دائر کر سکتے ہیں۔ ہائیکورٹ نے پیکا کے سیکشن 20 کے تحت صحافی بلال غوری اور ابصار عالم کے خلاف بھی مقدمات خارج کردئیے ہیں۔

یاد رہے کہ نجی چینل پر صحافی محسن بیگ کی جانب سے مبینہ طور پر مراد سعید کے خلاف نازیبا کلمات کہنے پر ایف آئی اے نے مراد سعید کی درخواست پر 16 فروری کو محسن بیگ کے خلاف مقدمہ درج کیا تھا، واضح رہے کہ آج اسلام آباد ہائیکورٹ نے پیکا ترمیمی آرڈیننس 2022ء بھی کالعدم قرار دے دیا ہے۔