اسلام آباد ہائی کورٹ نے شہزاد اکبر اور شہباز گل کے نام اسٹاپ لسٹ میں شامل کرنے کا نوٹی فیکیشن معطل کر دیا۔

تفصیلات کے مطابق شہزاد اکبر اور شہباز گل کی سٹاپ لسٹ سے نام نکلوانے کیلئے درخواست پر اسلام آباد ہائیکورٹ میں سماعت ہوئی ، چیف جسٹس اطہر من اللہ نے استفسار کیا کہ جی معاملہ کیاہے ، بلیک لسٹ کے حوالے سے عدالت کا فیصلہ موجود ہے ،وکیل نے کہا کہ اس وقت کوئی وزیراعظم بھی ملک میں موجود نہیں تھا، چیف جسٹس نے ریمارکس دیئے کہ نوٹس جاری کر کے کل پوچھ لیتے ہیں ،وفاقی حکومت کے علاوہ کوئی نام بلیکس لسٹ میں نہیں ڈال سکتا۔

واضح رہے کہ مذکورہ افراد کے نام اسٹاپ لسٹ میں ڈالنے کا معاملہ گزشتہ روز پیر 11 اپریل کو منظر عام پر آیا تھا۔ شہزاد اکبر اور شہباز گل دونوں عمران خان کے سابق معاونین خصوصی تھے۔ وفاقی تحقیقاتی ادارے ( ایف آئی اے) کی جانب سے جاری نوٹس میں عمران خان کے سابق معاونین خصوصی شہزاد اکبر ،شہباز گل اور ڈی جی اینٹی کرپشن پنجاب گوہر نفیس کا نام اسٹاپ لسٹ میں شامل کیا گیا جس کے بعد یہ بغیر اجازت بیرون ملک سفر نہیں کر سکیں گے۔