آرمی فارمیشن کمانڈر کانفرنس میں فوج کا بدنام کرنے کی مہم کا نوٹس لیا گیا ہے۔
جی ایچ کیو میں 79 ویں فارمیشن کمانڈرز کانفرنس آرمی چیف جنرل قمر جاوید باجوہ کی سربراہی میں منعقد ہوئی۔
کانفرنس میں کور کمانڈرز، پرنسپل سٹاف آفیسرز اور فارمیشن کمانڈرز نے شرکت کی۔ شرکاء کو پیشہ ورانہ امور کے علاوہ سیکیورٹی کے حوالے سے بریفنگ دی گئی۔
پاک فوج کے شعبہ تعلقات عامہ آئی ایس پی آر کے مطابق منگل کے روز آرمی چیف جنرل قمر جاوید باجوہ کی زیر صدارت ہونے والی فارمیشن کمانڈر کانفرنس میں پاک فوج کو بدنام کرنے اور معاشرے اور فوج کے درمیان تفریق پیدا کرنے کی حالیہ مہم کا نوٹس لیا گیا ہے۔
آئی ایس پی آر کے مطابق آرمی چیف جنرل قمر جاوید باجوہ نے کہا ہے کہ پاک فوج اپنی ذمہ داریوں کا ادراک رکھتی ہے اور ہر حال میں اندرونی و بیرونی خطرات سے ملک کو بچاتے ہوئے اس کی سالمیت اور خودمختاری کی حفاظت کرتی رہے گی۔
آئی ایس پی آر کا کہنا تھاکہ فورم نے کہا کہ پاکستان کی قومی سکیورٹی مقدس ہے، پاک فوج ہمیشہ سے ریاستی ادروں کو حفاظت کیلئے ان کے ساتھ کھڑی رہی ہے اور آئندہ بھی رہے گی اور اس پر کوئی سمجھوتہ نہیں ہوگا۔فورم نے آرمی لیڈرشپ کے آئین اور قانون کی بالادستی کو ہر صورت برقرار رکھنے کے طے شدہ موقف پر مکمل اعتماد کا اظہار کیا۔
آرمی چیف نے خطرات کے نمٹنے کیلئے فارمیشنز کی تیاریوں اور فوری ردعمل کے طریقہ کار پر اطمینان کا اظہار کیا۔
اس موقع پر قوم کی حفاظت کو یقینی بنانے کے لیے فوجی افسران اور جوانوں کو ان کی قربانیوں کو خراج تحسین پیش کیا گیا۔
