اسپیکر پنجاب اسمبلی پرویز الٰہی نے ڈپٹی اسپیکر دوست محمد مزاری کے اختیارات کی بحالی کے فیصلے کے خلاف اپیل دائر کر دی۔
تفصیلات کے مطابق چوہدری پرویزالٰہی کی طرف سےامتیازصدیقی ایڈووکیٹ کی وساطت سے لاہور ہائیکورٹ میں انٹرا کورٹ اپیل دائر کی گئی۔درخواست میں ڈپٹی اسپیکردوست محمد مزاری، سیکریٹری اسمبلی، آئی جی پنجاب، چیف سیکریٹری کو فریق بنایا گیا ہے۔
اسپیکر صوبائی اسمبلی نے درخواست میں مؤقف پیش کیا کہ چیف جسٹس نے ڈپٹی اسپیکر کے اختیارات بحالی پرقانون کا غلط اطلاق کیا۔ چیف جسٹس لاہور ہائی کورٹ نے اسمبلی رولزاورآئین کو نظر انداز کرکے ڈپٹی اسپیکر کے اختیارات بحال کیے۔درخواست میں یہ بھی مؤقف اختیار کیا گیا کہ اگر کسی کو اختیار دیا جائے تو واپس لینے کا اختیار ہونے کا مسلمہ اصول اعلی عدالتیں طے کرچکی ہیں۔
پرویزالٰہی کی درخواست میں یہ بھی کہا گیا کہ دوست مزاری کو وزارت اعلی انتخاب کروانے کی اجازت دینا قانون کی خلاف ورزی ہے۔ ڈپٹی اسپیکر کی ہائیکورٹ دائر کی گئی درخواست ہی ناقابل سماعت تھی۔وکیل درخواست گزار نے یہ مؤقف دیا کہ اسمبلی کی کارروائی کو آئینی دائرہ اختیار میں عدالت میں نہیں لایا جا سکتا۔ دوست مزاری کے اختیارات بحالی کا سنگل بنچ کا فیصلہ غیرقانونی وغیرآئینی قرار دے کر کالعدم کیا جائے۔
اسپیکرصوبائی اسمبلی پنجاب نے درخواست میں استدعا کی کہ درخواست کے حتمی فیصلے تک چیف جسٹس لاہورہائیکورٹ کے فیصلے کو معطل کیا جائے۔
