حکومت نے مستحق افراد کو ٹارگیٹڈ سبسڈی دینے کے لیے باضابطہ طور پر احساس راشن پروگرام کا اجراء کردیا، پروگرام سے 2 کروڑ خاندانوں کے 13 کروڑ افراد مستفید ہو سکیں گے۔
خیبر پختونخوا کے 2 کروڑ سے زیادہ کم آمدنی والے شہری احساس راشن پروگرام سے 30 فیصد سبسڈی پر آٹا، گھی اور دالیں قریبی کریانہ اسٹور سے خرید سکیں گے۔مستحق شہری احساس راشن پروگرام کی ویب سائٹ پر جائے گا اور اپنا شناختی کارڈ اور موبائل نمبر کا انداراج کرے گا، جانچ پڑتال کے بعد اگر کوائف درست پائے گئے تو اسے راشن کی خریداری پر رعایت ملے گی۔احساس راشن پروگرام کے لیے صوبائی حکومت نے 15 ارب روپے جبکہ وفاقی حکومت نے7 ارب روپے فراہم کیے ہیں، پروگرام 6 ماہ تک جاری رہے گا جس کے تحت شہری مختص کردہ کریانہ اسٹورز سے خریداری کر سکیں گے۔صوبائی حکومت کے مطابق احساس راشن پروگرام سمیت صوبے کے عوام کو آٹے پر 10 ارب روپے کی سبسڈی بھی دی جا رہی ہے۔
وزیر اعظم کی معاون خصوصی برائے سماجی تحفط و تخفیف غربت ڈاکٹر ثانیہ نشتر کا پریس کانفرنس میں کہنا تھا کہ وزیراعظم نےدو کروڑ خاندانوں کے لیے احساس راشن پروگرام کا اعلان کردیا ہے۔ یہ پروگرام مہنگائی کے تناظر میں لایا جارہا ہے اور یہ حکومت کی مستحق افراد کو ٹارگٹڈ سبسڈی دینے کے وژن کا حصہ ہے۔ اس پروگرام کے ذریعے 2 کروڑ خاندانوں کے 13 کروڑ افراد مستفید ہوں گے۔
احساس راشن رعایت پورٹل پر کم آمدنی والےگھرانوں اور کریانہ دکانداروں کی رجسٹریشن کا آغاز ہوگیا ہے۔ پروگرام کی بنیادی معلومات،وضع کردہ شمولیت کا طریقہ کار،اہلیت کا معیار اور شامل فوائد کےبارے میں جاننے کیلیئےاس لنک پرمعلوماتی ویڈیوملاحظہ کریں۔ https://t.co/aAyjHkuEwf#EhsaasRashan pic.twitter.com/Gq3XMh55O3
— Sania Nishtar (@SaniaNishtar) November 10, 2021
ان کا کہنا تھا کہ پروگرام میں مستحق شہریوں کی رجسٹریشن کے لیے پیر سے موبائل ایپ پورٹل کا آغاز کر دیا جائے گا جس پر شہری اپنے موبائل نمبر سے شناختی کارڈ نمبر کے اندراج کے ذریعے رجسٹرڈ ہوسکیں گے۔ دو سے تین ہفتوں کے دوران شہریوں کی رجسٹریشن کا عمل مکمل کیا جائے گا۔احساس راشن پروگرام کے لیے کریانہ اسٹورز کا انتخاب یونین کونسل کی سطح پر کیا جائے گا جبکہ ہر دکاندار کو اس پروگرام کی آگاہی کے لیے حکومت کی جانب سے خصوصی تربیت دی جائے گی۔
