وزیراعظم شہبازشریف نے ضلع دادو کی تحصیل میہڑ میں دو دیہات میں آگ لگنے کے واقعے پر افسوس کا اظہار کیا ہے۔

اسلام آباد – (اے پی پی): اپنے بیان میں وزیراعظم نے واقعے میں 6 بچوں سمیت 9 افراد کے جاں بحق ہونے پر گہرے رنج وغم کا اظہار کیا، انہوں نے کہا کہ متاثرہ دیہات کے مکینوں اورمتاثرین سے دلی ہمدردی اور افسوس کرتے ہیں، انہوں نے کہا کہ اس واقعہ میں جانی ومالی نقصانات پر میرا دل بے حد غمگین اور دکھی ہے ۔

وزیراعظم نے کہا کہ متاثرین کی امداد کے لئے وفاقی حکومت اقدامات کرے گی اور وہ سندھ کی صوبائی حکومت سے بھی متاثرین کی مالی امداد کے لئے بات کریں گے، وزیراعظم نے این ڈی ایم اے اور دیگر متعلقہ حکام کو ہدایت کی کہ متاثرہ خاندانوں کی بحالی میں بھرپور مدد کریں انہوں نے دعا کی کہ اللہ تعالیٰ جاں بحق ہونے والوں کو اعلی مقام عطا فرمائے اور لواحقین کو صدمہ برداشت کرنے کی ہمت دے۔