افغانستان میں طالبان حکومت کے سربراہ ملا محمد حسن نے کہا ہے کہ انہیں امید ہے کہ شہباز شریف کے وزیر اعظم منتخب ہونے سے دو طرفہ تعلقات کو فروغ ملے گا۔
ملا محمد حسن نے کہا کہ اسلامی جمہوریہ افغانستان کی حکومت اور عوام کی جانب سے ہم شہباز شریف کو اسلامی جمہوریہ پاکستان کے 23ویں وزیر اعظم منتخب ہونے پر مبارکباد پیش کرتے ہیں۔انہوں نے کہا کہ شہباز شریف کی بطور وزیراعظم تقرری ایک اچھا اور قابل قدر قدم ہے۔
ملا محمد حسن کا مزید کہنا تھا کہ ہمیں امید ہے کہ اس سے افغانستان اور پاکستان کے درمیان دو طرفہ تعلقات مضبوط ہوں گے، جو دونوں برادر ممالک کے درمیان دوستی، ترقی، خوشحالی کی بنیاد پر مبنی ہوں گے۔
انہوں نے کہا کہ امارت اسلامیہ افغانستان کی جانب سے میں یقین دلاتا ہوں کہ دونوں برادر ممالک اور مسلم پڑوسی ممالک کے درمیان اچھے اور جامع تعلقات کو مزید فروغ اور مضبوط کیا جائے گا۔
