پاکستان تحریک انصاف کے قومی اسمبلی سے استعفوں پر الیکشن کمیشن کا ردعمل سامنے آ گیا ہے۔

تفصیلات کے مطابق چیف الیکشن کمشنر سکندر سلطان راجہ کی صدارت میں الیکشن کمیشن کا اجلاس ہو،ا جس میں چیئرمین تحریک انصاف عمران خان کے الیکشن کمیشن کو لکھے گئے خط پر غور کیا گیا۔

بعد ازاں الیکشن کمیشن کے اعلامیے میں کہا گیا ہے کہ خط میں پی ٹی آئی چیئرمین عمران خان نے کہا کہ پارٹی نے قومی اسمبلی کی تمام نشستوں سے استعفے دے دئیے ہیں، اور اب قومی اسمبلی میں پی ٹی آئی کی کوئی نمائندگی نہیں ہے، علاوہ ازیں انہوں نے  منحرف اراکین اسمبلی  کے خلاف آرٹیکل 63 اے کے تحت کیس بھی بھیجا ہے۔

الیکشن کمیشن پاکستان نے کہا ہے کہ پی ٹی آئی کے قومی اسمبلی سے استعفوں پر اسپیکر کی جانب سے ابھی تک کسی رکن کے استعفے کا کوئی نوٹیفکیشن موصول نہیں ہوا، استعفوں کا کیس موصول ہوتے ہی اس پر قانون کے مطابق کاروائی کی جائے گی۔

الیکشن کمیشن نے بتایا ہے کہ  اراکین اسمبلی کے خلاف آرٹیکل 63 اے کا ڈیکلیریشن اسپیکر قومی و صوبائی اسمبلی نے بھیج دیاہے، اراکین قومی اسمبلی کو 28 اپریل کیلئے نوٹس جاری کر دئیے گئےہیں، جبکہ ممبران صوبائی اسمبلی کو 6 مئی کیلئے نوٹسز جاری کئے گئے ہیں، علاوہ ازیں تحریک انصاف کو بھی نوٹسز جاری کئے گئے ہیں۔

یاد رہے کہ پاکستان تحریک انصاف کے 100 سے زائد اراکین قومی اسمبلی نے اپنی نشستوں سے استعفے دے دئیے تھے،  جنہیں سابق  ڈپٹی اسپیکر قاسم سوری نے منظور کرتے ہوئے الیکشن کمیشن کو بھجوایا تھا،  تاہم نئے اسپیکر راجہ پرویز اشرف نے استعفوں کو ڈی سیل کر دیا تھا۔