پیپلز  پارٹی کے سینئر رہنما آصف علی زرداری نے کہا ہے کہ موجودہ حکومت کو ورثے میں ہولناک چیلنج ملے ہیں، قومی معیشت تباہ ہو کر رہ گئی ہے جبکہ ملک گوناگوں مسائل سے دوچار ہے۔

ایوان صدر میں بلاول بھٹو زرداری کی بطور وزیر خارجہ حلف برداری کی تقریب میں شرکت کے بعد بات چیت کرتے ہوئے کہا ہے کہ ملک میں آئندہ عام انتخابات آئندہ سال کے اختتام پر موجودہ پارلیمنٹ کی میعاد مکمل ہونے کے بعد ہوں گے اور نئے انتخابات تک موجودہ اتحاد کی حکومت اقتدار میں رہ کر عوام کی خدمت کرتی رہے گی۔

سابق صدر نے کہا کہ حکومت کو وقت اور سخت محنت درکار ہوگی، یہ توقع کی جانی چاہیے کہ حکومت میں شامل لوگ ملک کو ان تکالیف سے نجات دلانے میں اہم کردار ادا کریں گے۔