وزیر اعظم شہباز شریف نے پٹرولیم مصنوعات کی قیمتوں میں اضافہ کیلئے اوگرا کی جانب سے بھجوائی گئی سمری مسترد کرتے ہوئے قیمتیں پہلی سطح پر برقرار رکھنے کا فیصلہ کیا ہے۔

وزارت خزانہ کی جانب سے جاری بیان کے مطابق وزیراعظم نے ہدایت کی ہے کہ پٹرولیم مصنوعات کی قیمتوں کو برقرار رکھا جائے اور عالمی منڈی کی قیمتوں میں اضافے کا بوجھ صارفین پر نہ ڈالا جائے۔

وزیراعظم کے فیصلے کے بعد یکم مئی سے پٹرولیم مصنوعات کی قیمتیں 16 اپریل 2022ء کی سطح پر برقرار رہیں گی، جس کے مطابق پٹرول 149.86 روپے، ہائی سپیڈ ڈیزل 144.15 اور مٹی کا تیل 125.56 جبکہ لائٹ ڈیزل 118.31 روپے کی پرانی قیمتوں پر ہی فروخت کیا جائے گا۔