اسلام آباد ہائیکورٹ نے متعلقہ اداروں کو پاکستان تحریک انصاف کے رہنما شہباز گل کی گرفتاری سے روک دیا۔
تفصیلات کے مطابق پاکستان تحریک انصاف کے رہنما ڈاکٹر شہباز گل نے اپنے وکیل فیصل چوہدری کے ذریعے اسلام آباد ہائیکورٹ میں حفاظتی ضمانت کیلئے درخواست دائر کی جس میں مؤقف اختیار کیا گیا کہ میرے خلاف جھوٹی ایف آئی آر درج کی گئی، اپنے خلاف درج مقدمے میں شامل تفتیش ہونے کو تیار ہوں، اس لئے حفاظتی ضمانت منظور کرکے متعلقہ عدالت میں پیش ہونے کا موقع دیا جائے۔
چیف جسٹس اسلام آباد ہائیکورٹ جسٹس اطہر من اللہ نے شہباز گل کی درخواست پرسماعت کی، اور ان کے وکیل سے استفسار کیا کہ شہبازگل کہاں پرہیں؟ جس پر فیصل چوہدری نے بتایا کہ وہ 28 اپریل کو امریکہ گئے اور 4 مئی کو ان کی واپسی ہے۔ انہوں نے کہا کہ شہباز گل کے خلاف فیصل آباد، اٹک اور جہلم سمیت دیگرشہروں میں مقدمات درج کر دئیے گئے ہیں، اور انہیں سیاسی طور پر انتقام کا نشانہ بنایا جارہا ہے۔
فیصل چوہدری کا کہنا تھا کہ درخواست گزار عدالت کے سامنے پیش ہونا چاہتےہیں، ان کی واپسی کا ٹکٹ درخواست کے ساتھ لگایا ہے وہ 4 مئی واپس آئیں گے۔
عدالت نے فیصل چوہدری ایڈووکیٹ کے دلائل سننے کے بعد قانون نافذ کرنے والے اداروں کو ڈاکٹر شہباز گل کی گرفتاری سے روک دیا۔
