پاکستان پیپلزپارٹی کے رہنما فرحت اللہ بابر نے پی ٹی آئی قیادت پرتوہین مذہب کے مقدمات کی مذمت کی ہے۔

اپنے بیان میں فرحت اللہ بابر نے کہا کہ پی ٹی آئی رہنماؤں پرتوہین مذہب کے مقدمات تشویش ناک ہیں۔ انہوں نے کہا کہ  ماضی میں بھی میں نے ہمیشہ مذہب کے بطور ہتھیار استعمال کی مذمت کی ہے،  اب بھی اس کی مذمت کرتا ہوں اور مستقبل میں بھی ایسے اقدامات کی مذمت کروں گا۔

انہوں نے کہا کہ توہین مذہب قانون کے غلط استعمال کو روکنا ہوگا، اس قانون کو بطور ہتھیار استعمال نہ کیا جائے، اور عقل سے کام لیا جائے۔

یاد رہے کہ مسجد نبوی ﷺ میں پیش آنے والے افسوسناک واقعے پر سابق وزیراعظم عمران خان، فواد چوہدری، شہباز گل اور شیخ رشید سمیت 150 افراد کے خلاف توہین مذہب کا مقدمہ درج کر لیا گیا ہے۔