وزیراعظم شہبازشریف نے کہا ہے کہ پاکستان اس وقت شدید معاشی خطرات سے دوچار ہے، لیکن گھبرانے کی ضرورت نہیں ہے۔
ٹوئٹر پر جاری اپنے پیغام میں وزیراعظم شہبازشریف نے پوری قوم کو دل کی گہرائیوں سے عید کی مبارک دیتے ہوئے کہا کہ اللہ سے دعا ہے کہ یہ عید ہم سب کو ترقی اور خوشحالی کا پیغام لے کر آئے، اور پاکستان کو ان شدید مشکلات سے نجات دلائے۔
انہوں نے کہا کہ آج یوم عید ایک خاص دن سے بڑھ کر بے مثال اتحاد و یگانگت کا ایک خاص موقع ہے، آج گلہ کرنے کا نہیں گلے ملنے کا دن ہے، قوم کے یک قالب ہونے کا دن ہے اور مل کر مسکرانے کا دن ہے۔
آج یومِ عید ایک خاص دن سے بڑھ کر ایک خاص موقع ہے، بے مثال اتحاد و یگانگت کا۔ آج گلہ کرنے کا نہیں گلے ملنے کا دن ہے، قوم کے یک قالب ہونے کا دن ہے اور مل کر مسکرانے کا دن ہے۔ تمام پاکستانیوں اور عالمِ اسلام میں آباد ہر مسلمان کو میری طرف سے عید کی دلی مبارکباد
— Shehbaz Sharif (@CMShehbaz) May 3, 2022
وزیراعظم کا کہنا تھا کہ پاکستان اس وقت شدید معاشی خطرات سے دوچار ہے، لیکن ان سے گھبرانے کی ضرورت نہیں ہے، محنت، دیانت سے یہ مشکلات کم ہوں گی، مسائل کے حل کیلئے محنت کرنا ہماری ذمہ داری ہے، حکومت کا حصہ تمام متحدہ جماعتیں مل کر مسائل کا حل نکالیں گی، ہم ان مشکلات کو حل کرنے میں کوئی کسر نہیں چھوڑیں گے، اس میں آپ سب کی دعائیں اور تعاون کی ضرورت ہے، میں اپنی انتہائی محنتی قوم سے جلد خطاب کروں گا۔
شہبازشریف نے کہا کہ قوم کو لوڈ شیڈنگ سے نجات دلانے کیلئے کوشش کر رہے ہیں، عوام کی تکلیف کا احساس کرتے ہوئے پٹرولیم مصنوعات کی قیمتیں نہیں بڑھائیں، عوام آنے والے دنوں میں ملکی حالات میں بہتری دیکھیں گے۔
