وزیراعظم شہباز شریف نے کہا کہ ملکی معیشت کو تباہ کر دیا گیا ہے، جلد ہی قوم سے خطاب کروں گا۔
لاہور – (اے پی پی):وزیر اعظم شہباز شریف نے کہا کہ ملک شدید ترین معاشی خطرات میں گھرا ہے، ہمیں مشکلات کا اندازہ ہے ان پر قابو پانا حکومت اور اس کے اتحادیوں کی مشترکہ ذمہ داری ہے۔ وزیر اعظم محمدشہباز شریف نے نماز عید کی ادائیگی کے بعد جاتی امرا ء میں کارکنوں سے خطاب کرتے ہوئے کہا کہ مل کر مسائل کو حل کرنے کی کوشش کریں گے۔
انہوں نے کہا کہ پچھلے پونے چار سال میں ہمیں انتقام کا نشانہ بنایا گیا، شاہد خاقان عباسی، رانا ثنا اللہ، سعد رفیق، مفتاح اسماعیل، مریم نواز، حمزہ شہباز انتقام کا نشانہ بنتے رہے، میں ان تمام قائدین اور کارکنوں کو سلام پیش کرتا ہوں۔انہوں نے کہا کہ اللہ کے حضور دعا ہے کہ یہ عید ترقی و خوشحالی کا پیغام لے کر آئے،مشکلات پر قابو پانے کیلئے ہمیں اللہ کی رضا کے ساتھ سخت محنت کرنا ہو گی۔
شہباز شریف نے کہا کہ ملکی معیشت کو تباہ کر دیا گیا ہے جلد ہی قوم سے خطاب کروں گا۔وزیر اعظم شہباز شریف نے کہاکہ آج گلہ کرنے کا نہیں بلکہ گلے ملنے کا دن ہے۔ا نہوں نے کہا کہ آج کا دن قوم کے یک قالب ہونے اور مل کر مسکرانے کا دن ہے۔ وزیر اعظم شہباز شریف نے تمام پاکستانیوں اور عالم اسلام کو عید کی دلی مبارکباد بھی پیش کی۔
وزیر اعظم شہباز شریف اور وزیر اعلی پنجاب حمزہ شہباز نے جاتی امرا میں نماز عید الفطر ادا کی۔وزیر اعظم اور وزیر اعلی کی جانب سے نماز عید کے بعد ملکی سلامتی اور استحکام کیلئے خصوصی دعائیں کی گئیں۔شہباز شریف اورحمزہ شہباز نماز عید کے بعد لوگوں سے گلے ملے اور عید کی مبارکباد دی۔
