اسپیکر پنجاب اسمبلی  چوہدری پرویز الہیٰ نے کہا ہے کہ سب کہہ رہے ہیں کہ ہمارے خاندان میں اختلاف ہے، ایسی کوئی بات نہیں،  چوہدری سالک چلا گیا وہ کہیں نہیں گیا، چوہدری شجاعت نے اسے  کان سے پکڑ کر واپس لے آنا ہے۔ 

چوہدری شجاعت اور چوہدری پرویز الہٰی نے عید کی نماز کے بعد ظہور الٰہی ہاؤس میں کارکنوں سے عید ملی اور خطاب کیا۔اس موقع پر چوہدری پرویز الہیٰ نے کہا کہ ہمارے جو آپس میں اختلافات ہیں ان کی نہ کوئی وجہ ہے اور نہ  ہی کوئی ایسی بات ہے۔ جہاں چار بھائی ہوں وہاں سب کی رائے الگ ہو سکتی ہے۔

اسپیکر پنجاب اسمبلی کا کہنا تھا کہ الیکشن یا سیاست میں کسی ایک اکیلے کی گنجائش نہیں ہوتی،  یہ ضروری نہیں ہوتا  کہ آپ سیاست میں آئیں اور آپ کو عہدہ بھی مل جائے ۔ چوہدری شجاعت صاحب نے بہت محنت کی تب جا کے ان کا نام پہلی دفعہ ضلع کونسل کے الیکشن کیلئے نامزد ہوا ۔

چوہدری پرویزالہٰی نے کہا کہ عہدوں کا فائدہ اس وقت ہوتا جب ساتھ عزت ہو آپ کے کام بھی تب ہی نظر آتے ۔ میں تو اللہ تعالیٰ سے یہی کہتا ہوں ۔ جو بھی عہدہ دے عزت سے دے اگر عزت نہیں تو کچھ نہیں ۔

انہوں نے کہا کہ جب ہم سیاست میں آئے تو کہیں 18  سال کے بعد چوہدری شجاعت صاحب اور میں وزیر بنے ۔  انہوں نے کہا کہ چوہدری ظہور الہٰی نے ہمیں ایک ہی بات سکھائی ہے کہ بڑے کی عزت کرنی ہے۔