سابق وزیراعظم و چیئرمین پاکستان تحریک انصاف  عمران خان نے سابق پی ٹی آئی رہنما جہانگیر ترین اور علیم خان سے اختلافات کی وجہ بتا دی ہے۔

سوشل میڈیا پاڈ کاسٹ میں گفتگو کرتے ہوئے عمران خان کا کہنا تھا  کہ دونوں رہنماؤں کی پی ٹی آئی کیلئے بہت جدوجہد ہے، دونوں 11 برس  پہلے پارٹی میں آئے، اور طویل جدوجہد کی۔

پی ٹی آئی چیئرمین نے کہا کہ  جہانگیر ترین پر چینی کمیشن بنانے پر اختلافات شروع ہوئے جبکہ علیم خان نے دریائے راوی میں 300 ایکڑ اراضی لی تھی اور اس کو قانونی قرار دلوانا چاہتے تھے۔

انہوں نے کہا کہ ان دونوں کیلئے کرپشن اہمیت نہیں رکھتی اس لئے یہ لوگ ن لیگ کے ساتھ جا کر بیٹھ گئے ہیں۔اگر ان دونوں افراد کا میرا والا نظریہ ہوتا تو آج میرے ساتھ ہوتے۔

عمران خان نے بتایا کہ  علیم خان پر نیب کے بھی کیسز تھے جب کہ ان کا نام پنڈورا باکس میں بھی آیا تھا۔