پی ٹی آئی کے منحرف رکن صوبائی اسمبلی علیم خان ترین نے عمران خان کے الزامات پر سخت ردعمل کا اظہار کیا ہے۔
عمران خان کے الزامات پر ردعمل میں علیم خان نے کہا کہ عمران خان نے مجھ پر الزام لگایا کہ علیم خان 300 ایکڑ زمین لیگلائز کروانا چاہتا تھا، میں 2010ء سے 2018ء تک اپوزیشن میں عمران خان کے ساتھ کھڑا رہا، یہ سوسائٹی 2010ء میں بھی میرے پاس تھی جو آج بھی میرے پاس موجود ہے، عمران خان میرے والد کی وفات پر اس سوسائٹی میں آئے تھے۔
انہوں نے کہا کہ کیا 10 سال پہلے مجھے پتہ چل گیا تھا کہ عمران خان 2018ء میں وزیراعظم ہوں گے، میرے پاس 300 ایکٹر نہیں 3000 ایکڑ زمین ہے، میں نے زمین ایکوائر نہیں کروائی بلکہ پرائیویٹ زمینداروں سے خریدی ہے، یہ زمین اب روڈا کے پاس ہے یہ اتھارٹی عمران خان نے بنائی، یہ زمینیں روڈا نے سرکاری قیمت پر خرید کر پرائیویٹ ڈیویلپرز کو کیسے دیں؟
علیم خان کا کہنا تھا کہ اب تفتیش ہونی چاہیے کہ یہ زمینیں کن ڈیویلپرز کو دی گئیں، سرکاری ریٹ پر خرید کر زمینیں من پسند پرائیویٹ ڈیویلپرز کو دی گئیں، ایل ڈی اے کے وائس چیئرمین کے رشتہ دار بھی کیا ان ڈیویلپرز میں شامل ہیں؟ انہوں نے کہا کہ سرکاری ریٹ پر زمین ایکوائر کرکے پلازے بنائے گئے، اگر روڈا کے تحت آپ کا گالف کورس بن سکتا ہے تو علیم خان کی سوسائٹی کیوں نہیں؟ اگر روڈا پراجیکٹ براؤن ہے تو وہیں میری زمین کیسے گرین ہوں گی؟
پی ٹی آئی کے منحرف رکن صوبائی اسمبلی کا کہنا تھا ہر مشکل وقت میں کیا میں اس لئے کھڑا تھا کہ میں نے 300 ایکٹر کا اسٹیٹس تبدیل کروانا تھا؟ اگر عمران خان میرے بارے میں غلط الزام لگائیں گے تو میں بھی چپ نہیں رہوں گا، اگر پ میرا نام تمیز سے لیں گے تو میں بھی آپ کا نام تمیز سے لوں گا، اگر آپ منہ کھلوانا چاہتے ہیں تو کسی چینل پر میرے اور جہانگیر ترین کے ساتھ بیٹھیں، پھر سب سچ بولیں تاکہ عوام کو پتہ چلے علیم خان، جہانگیر ترین اور عمران خان کا اصل چہرہ کیا ہے۔
علیم خان کا کہنا تھا کہ عمران خان سن لیں میرے پاس اس وقت 10 ہزار ایکٹر سے زائد زمین ہے، آپ نے 300 ایکٹر پر الزام لگا دیا میری محنت اور کوشش کا یہ مول لگایا، لوگوں کے سامنے سچ بولیں اور انہیں حقائق بتائیں۔
انہوں نے کہا کہ میں امریکی اور یورپین سفیر کو عمران خان کے گھر ملا تھا، برطانوی سفیر کو اگر آپ حکومت میں آنے سے پہلے مل سکتے ہیں تو حکومت میں کیوں نہیں، آپ ملیں تو محب وطن کوئی اور ملے تو غدار، اپنے وزرا کو دیکھیں کون سفیروں کو ملتا رہا، یہ کیا اسٹینڈرڈ ہے کہ جو آپ کے علاوہ ملا وہ غدار ہے۔ انہوں نے مزید کہا کہ ہم مصلحت کے تحت خاموش ہیں، آپ سیاست کریں لوگوں کو ورغلائیں جھوٹ بولیں لیکن میں سچ بولوں گا۔
یاد رہے کہ گزشتہ روز ایک انٹرویو میں سابق وزیراعظم عمران خان نے کہا تھا کہ علیم خان اور جہانگیر ترین کا مقصد اقتدار میں آنے کے بعد فائدہ اٹھانا تھا، علیم خان اپنی 300 ایکڑ زمین لیگل کروانا چاہتے تھے جبکہ جہانگیر ترین کو شوگر کمیشن سے مسئلہ تھا۔
