یوٹیلیٹی اسٹورز پر اشیائے ضروریہ کی قیمتوں میں اضافہ کردیا گیا ہے۔

نئی قیمتوں کے حوالے سے جاری نوٹیفکیشن کےمطابق یوٹیلیٹی اسٹورز پر دال، بیسن اور کھجور پرسبسڈی ختم کردی گئی ہے۔

علاوہ ازیں دالوں کی قیمت میں 10 روپے فی کلو اضافہ کیا گیا ہے، جس کے بعد دال ماش 278 اور دال مونگ 170 روپے فی کلو ہوگئی ہے، جب کہ بیسن کی فی کلو قیمت میں 20 روپے کا اضافہ کیاگیا ہے جس سے بیسن اب 170 سے 190 روپے کلو ہوگیا  ہے۔

یوٹیلیٹی اسٹورز پر مختلف برانڈ کی اشیاء کی قیمتوں میں بھی اضافہ کیا گیا ہے جس کے تحت مختلف برانڈ کے کوکنگ آئل کی فی لیٹر قیمت میں 20 روپے تک کا اضافہ  ہواہے جب کہ مختلف برانڈ کا فی لیٹر دودھ بھی 20 روپے مہنگا ہوا ہے۔

نوٹیفکیشن کےمطابق مختلف برانڈ کے 1500 ملی لیٹر کے شربت کی بوتل 51 روپے تک مہنگی ہوئی ہے اور 190گرام چائےکی پتی کی قیمت میں 12 روپے تک کا اضافہ  کیا گیا ہے۔

دوسری جانب آٹے کی قیمت میں بھی اضافہ کرتے ہوئے آٹے کے 10 کلو تھیلے کی پرچون قیمت650 روپے جبکہ 20 کلو تھیلے کی پرچون قیمت 1300 روپے کردی گئی ہے۔